İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 193 Hüküm no: 201 Orijinal metin no: [52b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine Hatun’a ait olan kalaycı aletlerine dışarıdan karışılmasının engellenmesi Ma‘rûz Arzuhâl eden Âmine Hatun bt. Ömer’in zevci ve tarafından husûs-ı âtîde vekîli olup zikri âtî mâlike olduğu kalaycı âlât-ı lâzımesine bi’l-emâne vaz‘-ı yedi olduğu ikrârıyla mütehakkık olan el-Hâc Abdullah meclis-i şer‘-i şerîf-i enverde derûn-ı arzuhâlde mezkûrü’l-ism Kalaycı Sarı Mehmed b. Halil nâm kimesne ile terâfu‘larında mahrûse-i Galata’ya muzâfa kasaba-i Tophâne’de Fîruzağa mahallesinde vâki‘ müşâhereten müste’ciri olduğum beyne’l-cîrân ma‘lûm bir bâb kalaycı dükkânı derûnunda [53a] mevcûde beyne’l-hıref gedik ta‘bîr olunur âlât-ı lâzıme-i ma‘lûme zevcem müvekkile-i mezbûre Âmine Hatun’un bâ-hüccet ve bâ-i‘lâm mâlı ve mülkü olup benim ve âharın aslâ alâkası yoğiken mezbûr Sarı Mehmed âlât-ı mezkûreden benim dahî alâkam vardır deyü bana ve zevcem müvekkile-i mezbûreye bi-gayr-ı hakkin müdâhale eder deyü ba‘de’d-da‘vâ ve’l-istintâk mezbûr Sarı Mehmed dahî âlât-ı mezkûrede aslâ alâka ve medhali olmayıp müvekkile-i mezbûre Âmine Hatun’un mâlı ve mülkü olduğunu ikrâr ve i‘tirâf eylediği bi’l-iltimâs huzûr-ı âlîlerine i‘lâm olundu. Fî 2 Zilka‘de sene 1202.