İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 193 Hüküm no: 202 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camcı Ali’nin vakfı olup yanan mescid-i şerifi yeniden inşa eden Hâfız Mehmed Said Efendi’nin yaptığı harcamaların muhasebesinin görülmesi Ma‘rûz Nezâret-i dâ‘îlerinde âsûde evkâfdan merhûm ve mağfûrun leh Ebu’l-feth Sultân Mehmed Hân -aleyhi’r-rahmetü ve’l-gufrân- hazretlerinin camcıbaşısı Camcı Ali nâm sâhibü’l-hayrın mahmiyye-i İstanbul’da Sultan Bâyezid-i Velî Câmi‘-i Şerîfi civârında Gurâbiyeciler sûkunda vâki‘ mescid-i şerîfi vakfının mütevellîsi derûn-ı arzuhâlde mezkûrü’l-ism Hâfız Mehmed Said Efendi b. el-Hâc Abdullah meclis-i şer‘-i şerîf-i enverde vakf-ı mezbûr kâtibi Ali Efendi b. Mustafa ve Câbî Ali Efendi b. Halil ve imâm vekîli es-Seyyid Hasan Efendi ve mahalle-i mezbûre ahâlîsinden Süleyman Efendi b. İbrahim ve Mustafa Ağa b. Ali ve İbrahim Ağa b. Mustafa ve Salih Ağa b. İbrahim ve Ömer Ağa b. Ali ve Çukadâr Mustafa Ağa nâm kimesneler hâzırlar oldukları hâlde takrîr-i kelâm ve ta‘bîr ani’l-merâm edip işbu yedimde olan bir kıt‘a hüccet-i şer‘iyye nâtıka olduğu üzre mescid-i şerîf-i mezkûru ba‘de’l-ihrâk bi’l-izni’ş-şer‘î müceddeden binâ edip kereste ve amele ve eşyâ’-i sâ’ire vezâyif ve bi’l-cümle mesârif-i lâzımesine masrûf ve îrâd-ı vakfdan makbûzumun hesâbı ma‘rifet-i şer‘le rü’yet olundukda ber-mûceb-i defter-i muhâsebe elli yedi bin yedi yüz seksen akçe cânib-i vakfda hakkım olduğu zâhir olmuşidi elhâletü hâzihî zikr olunan elli yedi bin yedi yüz seksen akçeyi vakf-ı şerif-i mezkûra teberrû‘ edip mutâlebesinden ibrâ ettiğimden sonra ba‘de’l-yevm vakf-ı şerîf-i mezkûra ba‘de’l-yevm müte‘allika bi’t-tevliye masrûf ve makbûzumun beher sene muhâsebesi mürtezika-i vakf ve ahâlî-i mahalle bulunmadıkca rü’yet etmemeğe ta‘ahhüd eyledim deyü mütevellî-i mezbûr Hâfız Mehmed Said Efendi’nin meblağ-ı mezkûr elli yedi bin yedi yüz seksen akçeyi vakf-ı şerîfe teberrû‘ ve ibrâ edip ve beher sene muhâsebesini mürtezika-i vakf ve ahâlî-i mahalle ma‘rifetleriyle rü’yet etmek üzre ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 25 min Şevvâl sene 1202.