İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 194 Hüküm no: 203 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Enan’ın mutasarrıfı olduğu değirmeni, devlete olan borçları dolayısıyla Mustafa Beşe ile Kigork v. Badesar’a feragat ettiği Ma‘rûz Mahrûse-i Galata’ya muzâfa kasaba-i Tophâne’de Fındıklı’da Kazgânî mahallesinde vâki‘ üç horoslu bir bâb uncu değirmenin mutasarrıfı Asvador v. Enan nâm zimmî meclis-i şer‘-i şerîf-i enverde şerîki olup diyâr-ı âharda olan Agik v. Karabet nâm zimmî tarafdan vekîli Uncular Kethüdâsı Mustafa Ağa ve mazbûtü’l-esâmî ustalar hâzırlar oldukları hâlde Mustafa Beşe b. Abdullah ve Kigork v. Badesar nâm zimmî muvâcehelerinde değirmen-i mezkûr bundan akdem mesdûd ve mu‘attal olup ve cânib-i mîrîye dahî üç bin dokuz yüz otuz yedi guruş deyni olmağla mutasarrıfı olan Kigork v. Badesar nâm zimmî deyn-i mezkûrun iki yüz elli guruşunu teslîm bâkî üç bin altı yüz seksen yedi guruşunu beher sene üçer yüz guruş taksît ile edâ etmek üzere rızâsıyla keff-i yed Variriş nâm zimmîye ihâle olunup ol dahî edâ-yı deyn ile değirmen-i mezkûru idâre ve i‘mâle kādir olmamağın değirmen-i mezkûru küşâd edemeyip mesdûd kalmağın bundan akdem ben ve refîkim gâ’ib-i mersûm değirmen-i mezkûru küşâd ve i‘mâl etmek zu‘mıyla deyn-i mezkûrdan beher sene beşer yüz guruş edâ etmek üzere deruhde ve iltizâm edip yedimize başmuhâsebeden işbu sûret i‘tâ olunmuşidi lâkin ben ve refîkim mersûm [53b] dahî değirmen-i mezkûru bir vecihle küşâd ve i‘mâle kādir olmadığımızdan refîkim mersûm terk-i diyâr ile firâr edip ben dahî yalnız idâreye kādir olmadığımdan hâlâ değirmen-i mezkûr mesdûd ve deyn-i mezkûr edâ olmamağın siyâneten li’l-mîrî beher sene hitâmında deyn-i mezkûrdan edâ ve tenzîl olunmak üzre mukayyed ve meşrût olan sâlifü’l-beyân beş yüz guruşu edâ ve değirmen-i mezkûru küşâd ve i‘mâl ve idâre etmek üzre işbu mezbûr Mustafa Bey’e ve refiki Kigork zimmî deruhde ve iltizâm etmeleriyle ben dahî nef‘an li’l-mîrî keff-i yed edip değirmen-i mezkûrun ber-minvâl-i meşrûh küşâd ve idâresi bizim keff-i yedimizden merkûmâna ihâle ve merkûmân ale’l-iştirâk mutasarrıf olmalarıçün başmuhâsebeye kayd birle yedlerine sûret i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî gurre-i Zilka‘de sene 1202.