İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 195 Hüküm no: 204 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın kasap dükkanı gedik hisse ve aletlerini Mehmed Said’e sattığı Ma‘rûz Medîne-i Hazret-i Ebâ Eyyûbe’l-Ensârî’de vâki‘ selhhâneden İkinci Selhhâne’ye merbût ve vakf-ı şerîf-i mezkûr müstagallâtından Sultân Mehmed Câmi‘-i Şerîf kurbünde Küçük Karaman’da Kavukçular mukâbelesinde berber ve sebîl beyninde kâ’in bir bâb dükkân derûnunda mevcûde olup beyne’l-hıref gedik ta‘bîr olunur kasab âlât-ı lâzımesine mütevellî-i vakf temessüküyle mutasarrıf olan Mehmed b. Mustafa asâleten ve Abdi Ağa b. Mustafa’nın oğlu ve tarafından vekîli es-Seyyid Mehmed Sadık vekâleten meclis-i şer‘-i şerîf-i enverde Kasabbaşı Mehmed Emin Ağa tarafından vekili Kasab Kethüdâsı Ebubekir Ağa ile Feyzullah Usta hâzır olduğu hâlde kasab ustası olduğu bi’l-ihbâr mütehakkık olan Mehmed Said b. Mustafa mahzarında her biri ikrâr ve takrîr-i kelâm edip mârrü’l-beyân alât-ı lâzımeden asâleten ve vekâleten mutasarrıf olduğumuz nısf-ı şâyi‘alarımızı hüsn-ı rızâ ve tayyib-i ihtiyârımız ile bedel-i ma‘lûm ve makbûz mukâbelesinde merkûm Mehmed Said Ağa’ya ferâğ ve tefevvüz ve kabûl edip ba‘de’l-yevm âlât-ı lâzıme-i mezkûrede kat‘â alâka ve medhalimiz kalmayıp merkûm Mehmed Said’in hakk-ı mufavvazı olmuşdur dediklerinde gıbbe’t-tasdîk mezbûr Mehmed Said âlât-ı mezkûre-i merkûmânın kasr-ı yedlerinden defter-i vakfa kendi üzerine kayd ve yedine müceddeden temessük i‘tâ olunmak ricâsında olunduğu İstanbul Mahkemesi’nden huzûr-ı âlîlerine i‘lâm olundu olbâbda emr hazret-i veliyyü’l-emrindir. Fî 5 min Zilka‘de sene 1202.