İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 196 Hüküm no: 205 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Hâfız Mehmed Efendi’nin mahalleden Emetullah ve Zeyneb Hatun’u odun ile dövüp küfretmesinden dolayı imamlık görevinden alınıp yerine başka birinin tayin edilmesinin talep edildiği İstanbul’da Hoca Hayreddin mahallesinde sâkine ma‘rifetü’z-zât Emetullah bt. Abdullah meclis-i şer‘-i şerîf-i enverde mezbûre Emetullah ile ma‘an sâkine olup zâtı mu‘arrefe olan Zeyneb Hatun bt. Abdülfettah hâzıra olduğu hâlde Hoca Gıyaseddin imâmı es-Seyyid Hâfız Mehmed Efendi b. Mustafa ile terâfu‘larında takrîr-i kelâm edip ben ve refîkam hâzıra-i mezbûre Zeyneb Hatun dünkü yevm-i Cum‘a ba‘de’l-asr kendi menzilimize gider iken esnâ-yı tarîkde imâm-ı merkûma tesâdüf edip size söyleyeceğim vardır deyü bizi kendi menziline da‘vet edip biz dahî hânesinde iyali olmak zu‘mıyla menziline duhûl ettiğimizde hurûc ve firâr ettiğimizde imâm-ı merkûm bana zinâ etmek üzere takarrüb etmeğin nefsimi teslîm etmeyip menzil-i mezkûrdan kapı önünde zokakda bize yereşüb? zerdeste ta‘bîr olunur ağaçdan masnu‘ âlâtıyla bizim başımıza vesâ’ir a‘zâmıza [54a] darb u şetm etmeğin mûcib-i şer‘îsi icrâ olunmak murâdımızdır deyü ba‘de’d-da‘vâ ve’l-inkâr müdde‘iyyetân-ı mezbûretânın bi’l-cümle takrîr-i meşrûhları vâkı‘a mutâbık olup imâm-ı merkûm Hâfız Mehmed Efendi dünkü yevm-i Cum‘a ba‘de’l-asr kendi menzili önünde zerdeste ta‘bîr olunur ağaçdan masnu‘ âlâtıyla müdde‘îyyetân-ı mezbûretânı darb ve şetm eylediğini udûl-ı ahrâr-ı ricâl-i Müslimînden mahalle-i mezbûre ahâlîsinden el-Hâc Mehmed Emin Ağa b. el-Hâc Veliyyüddin ve Ahmed Ağa b. Süleyman nâm kimesneler şehâdetleriyle imâm-ı merkûm muvâcehesinde ber-nehc-i şer‘î beyân ve isbât etmeleriyle mûcibince imâm-ı merkûm hâlâ nakîbü’l-eşrâf efendi ma‘rifetiyle ta‘zîr-i şer‘î olunup ümenâdan olmamağın imâmet-i mezkûre ref‘inden ahâlî-i mahallenin muhtârı sâlih ve mütedeyyin vakârı olduğu ba‘de’l-ihbâr zâhir olan bir kimesneye tevcîh buyurulmak bâbında emr-i âlî sudûru emr-i sevâb olduğu İstanbul Mahkemesi’nden huzûr-ı âlîlerine i‘lâm olundu. Fî 6 min Zilka‘de sene 1202.