İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 196 Hüküm no: 206 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeşhane Kethüdası es-Seyyid İbrahim’in muhzır Mustafa Çelebi’yi haksız yere dövmesi sebebiyle görevinden azl ve Boğazkesen kalesinde habs olunmasının taleb edildiği Maryem Nasrâniye’nin simkeş tâ’ifesinden Lütfi nâm zimmî ile bir tek bilezik nizâ‘ı olup merkûm Lütfi zimmî ile bâb nâ’ibimiz es-Seyyid Ahmed Efendi huzûrunda lede’l-murâfa‘a da‘vâsından otuz guruşa sulh oldukda bedel-i sulhu hasmı mezbûra edâ içün merkûm Lütfi zımmî mahkeme-i mezbûrede muhzırlarından Mustafa Çelebi yedinden otuz guruş iktirâz ve hasmı mersûme ile ibrâ’ oldukdan sonra sâ’ir masârıfi içün üç guruş bir rub‘ dahî iktirâz edip muhzır-ı mezbûra deyni olan cem‘an otuz üç guruş bir rub‘u edâ içün simkeşhâneye vardıklarında Simkeşhâne Kethüdâsı es-Seyyid İbrahim muhzır-ı merkûmu darb edip kolluk neferi ile alenen Ağakapısı’na varınca esvâk ve mahallâtda tecdîd-i îmân ve akdi mûcib ve ta‘zîri muktezî şer‘-i şerîfi tahfîf eder kelimât telaffuz eylediğini kethüdâ-yı merkûm muvâcehesinde udûlden Salih Efendi b. el-Hâc Mustafa ve Hâfız İshak Efendi b. Mahmud nâm kimesneler haber vermeğin mûcebince kethüdâ-yı merkûma tecdîd-i îmân ve akd lâzım gelip ve ibreten li’s-sâ’irîn merkûmun şer‘-i şerîfi tahfîfine binâ’en Boğazkesen Kal‘ası’nda kal‘a bend olunmasıçün fermân-ı âlîleri sudûru nâ’il-i ecr-i cezîl olduğu ma‘lûm-ı devlet-i aliyyeleri buyuruldukda emr u fermân hazret-i veliyyü’l-emrindir. Fî 5 min Zilka‘de sene 1202.