İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 198 Hüküm no: 208 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzâz esnafının nizamını ihlal eden Kör Ahmed’in kalabend olarak cezalandırılmasının talep edildiği Ma‘rûz Arzuhâl eden kazzâz esnâfının kethüdâları Ömer Ağa ve Yiğitbaşıları Mehmed Odabaşı ve Kazzâzbaşı Mustafa Ağa vesâ’ir isimleri mazbût Müslim ve Nasârâ ve Yahûdî ustalar sâdır olan emr-i âlîlerine imtisâlen Harameyn-i muhteremeyn müfettişi müderrisîn-i kirâmdan es-Seyyid Abdülhalim Efendi dâ‘îleriyle bi’l-ma‘iyye dâ‘îhânede ma‘kûd meclis-i şer‘-i hatîrde merhûm Sultân Ahmed Hân -tâbe serâhu- hazretlerinin enderûn-ı hümâyûnda vâki‘ kütübhâne vakfının mütevellîsi tarafından vekîli kâtib-i vakf el-Hâc İsmail Efendi hâzır olduğu hâlde vakf-ı mezbûrdan Fazlıpaşa Sarayı’nda sâkin ibrişim bükücü amelesinden Kör Ahmed nâm kimesne muvâcehesinde her biri takrîr-i kelâm edip vakf-ı mezkûr musakkafâtından olup bi’l-icâreteyn altmış nefer ma‘lûmü’l-esâmî ustalarımızın tasarruflarında olan sâlifü’z-zikr Fazlıpaşa Sarayı’nda vâki‘ bodrum ta‘bir olunur otuz aded odada iskân eylediğimiz bükücü tâ’ifesi bizim mûcib-i emr-i hümâyûn bi’t-terâzî ücret ile istihdâm eylediğimiz amelemizden olup merkûmların iktizâ eden umûrlarını kethüdâmız rü’yet etmek şurût-ı nizâmımızdan iken merkûm Kör Ahmed kendi hâlinde olmayıp merkûmları bizden tefrîk edip başka esnâf olmak içün üzerlerine müstakil kethüdâ nasb ettirmek dâ‘iyyesiyle şurût-ı nizâmımızın ihtilâl ve ibâdullâhın ızrârına kasd eylediğinden mâ‘adâ bundan akdem sırkası zâhir olmağla kal‘a bend olmuşidi lâkin merkûm hâlâ ıslâh-ı nefs olmayıp yine merkûmları iğfâl ile nizâ‘a tasaddî eylediği halâ lede’ş-şer‘ zâhir ve nümâyân olmuşdur deyü tarafeynin ıstırâhı ve ibâdullâhın nef‘i içün merkûmun bu def‘a dahî ıslâh-ı nefs oluncaya değin kal‘a bend olunması istid‘â eyledikleri ma‘lûm-ı devlet-i âsafâneleri oldukda olbâbda emr hazret-i veliyyü’l-emrindir. Fî 11 min Zilka‘de sene 1202.