İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 199 Hüküm no: 209 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc es-Seyyid İbrahim’in simkeş kethüdalığından azl edilip yerine el-Hâc Süleyman Ağa’nın kethüda tayin edildiği Ma‘rûz Âsitâne-i aliyye’de vâki‘ simkeş esnâfından arzuhâl eden Simkeşbaşı Mehmed Salih Ağa ve şeyhleri es-Seyyid Hasan Efendi ve es-Seyyid el-Hâc İsmail Ağa ve Bekcizâde Mehmed Ağa ve Eğrikapılı Mehmed Emin Ağa ve Mahmud Ağa ve es-Seyyid Yakub Ağa ve el-Hâc Osman Ağa ve diğer Osman Ağa ve es-Seyyid Mehmed Ağa ve İsmail Ağa ve diğer es-Seyyid Mehmed Emin Ağa ve diğer Mehmed Emin Ağa ve Geredeli Hüseyin Ağa ve es-Seyyid İbrahim Ağa ve Ahmed Ağa ve Tarakcızâde Mehmed Emin Ağa nâm Müslimîn ve zımmî ustabaşılarından Kılabdancı Agob ve Kalos ve Matos [55b] ve Bogos ve Küçük Agob ve Hürmüz ve Mikail ve Kigork ve Artin ve Makos ve Mığırdıç ve Kalfa Karabet nâm zimmîler ve Yahûdî ustalarından Lirzoşim ve Cedidaron ve Kemal vesâ’ir mazbûtü’l-esâmî ustalar meclis-i şer‘-i şerîf-i enverde hâlâ bâ-emr-i âlî üzerlerine kethüdâ nasb olunan el-Hâc Süleyman Ağa hâzır olduğu hâlde her biri takrîr-i kelâm ve ta‘bîr âni’l-merâm edip işbu yedimizde olan bir kıt‘a emr-i âlî mantûkunca bundan akdemce bâ-i‘lâm kal‘a bend olan es-Seyyid el-Hâc İbrahim nâm kimesne kendi hâlinde olmayıp dâ’imâ esnâfımızın nizâmlarını ihtilâl ve râhatlarını kat‘ ile ezâ ve cefâ üzre olduğundan bi’l-iştikâ te’dîb içün kal‘a bend olup aslâ ve kat‘a esnâfın umûruna karışmamak üzre bâ-emr-i âlî ıtlâk olundukdan sonra yine ıslâh-ı nefs olmayıp bir takrîb üzerimize kethüdâ olmağla her birimizi bir gûne tekdîr ve dil-gîr ve gâ’ib ani’l-meclis Mehmed Arif nâm kimesne ile yek-dil olup ba‘zımızı habs ve ba‘zımızı bir töhmet ile tecrîm ve ta‘cîz edip izmihlâl ve perîşân olmamıza sâ’î olduklarından mâ‘adâ çend rûz zarfında kıbel-i şer‘den meb‘ûs Muhzır Mustafa Çelebi nâm hademe, şer‘î darb ve şetm ve şer‘-i şerifi tecdîd-i îmân ve nikâhı mûcib kelimât ile tahfîf eylediği şuhûd-ı udûl ile lede’ş-şer‘ sâbit ve mütehakkık olduğuna binâ’en bâ-i‘lâm kal‘a bend olup kethüdâlıkdan azl ve yerine bâ-emr-i âlî işbu hâzır-ı merkûm el-Hâc Süleyman Ağa üzerimize kethüdâ nasb olunmağla fîmâ ba‘d merkûm el-Hâc es-Seyyid İbrahim ba‘de’l-ıtlâk kethüdâlık dâ‘iyyesiyle esnâf-ı mezbûra müdâhale etmeyip ve refîki merkûmla ikisi dahî loncalarına dâhil olmayıp aslâ ve kat‘â esnâfdan Müslim ve zimmî ve Yahûdî’den birine müdâhale ve mu‘âraza birle tekdîr etmemek ve vechen mine’l-vücûh umûrlarına karışmamak ve eğer ısgâ etmeyip kemâ kân umûrlarına müdâhale ve loncalarına dâhil olmak murâd ederler ise derhâl ahz ve diyâr-ı bâ‘îdeye mü’ebbeden nefy ve iclâ olunmak üzre başmuhâsebeye kayd olunup yedlerine mü’ekked tuğrâlı emr-i âlî inâyet ve ihsân buyurulmak ricâsında oldukları bi’l-iltimâs huzûr-ı âlîlerine i‘lâm olundu. Fî 13 min Zilka‘de sene 1202.