İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 200 Hüküm no: 210 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafından Mühtedî İbrahim, Kirkor, Mardik ve kapancıları Mığırdıç’ın fırın ve değirmen gedik hisse ve aletlerini borçlarını ödeyememeleri sebebiyle es-Seyyid Mustafa Ağa’ya sattıkları Habbâzân Kethüdâsı İsmail Ağa ve nizâm ustalarından Ahmed Ağa ve Molla Mehmed ve Ebubekir Beşe ve Usta Kirkor ve Usta Tokel ve Usta Bogos vesâ’ir mazbûtü’l-esâmî ustalar meclis-i şer‘-i şerîf-i enverde hatîr-i lâzımü’t-tevkîrde kapân tüccârından olup kendi nefislerinden asîl ve Ahmed Ağa ve el-Hâc Ömer Ağa ve el-Hâc Mustafa Ağa ve A‘yân el-Hâc Hüseyin Ağa ve Zeytuncı es-Seyyid el-Hâc Ahmed Ağa ve Kırımî el-Hâc İsmail Ağa ve Mehmed Yazıcı ve Mustafa Yazıcı ve Kasab es-Seyyid Mehmed Ağa [56a] ve es-Seyyid Abdullah Ağa ve Feyzullah Yazıcı ve Ahmed Yazıcı ve Abdülkadir Ağa taraflarından vekîlleri olan Tintin el-Hâc Mustafa Ağa ve Bebekli es-Seyyid Mustafa Ağa ve Yazıcı Molla Mehmed hâzırlar oldukları hâlde zikri âtî fırın ve değirmen âlâtının müşterîsi es-Seyyid Mustafa Ağa b. es-Seyyid Ahmed mahzarlarında takrîr-i kelâm ve ta‘bîr ani’l-merâm edip esnâfımızdan cânib-i mîrî ve kapân tüccârlarına semen-i hıntadan deyni olup edâya kudreti olmamağın firâr ve gaybet eden habbâz ustasının mâlik olduğu beyne’l-hıref gedik ta‘bîr olunan âlât-ı lâzımesi kethüdâ ve nizâm ustaları ve dâyinleri olan kapân tüccârları ma‘rifetleriyle âhâra bey‘ ve semninden deyinleri edâ olunmak şurût ve nizâmımızdan olmağın medyûn olup edâya kudreti olmayanlar âlât-ı lâzımelerini kendileri âhara bey‘ ve edâ-i deyn edip firâr edenler dahî ber-vech-i muharrer âlât-ı lâzımelerin âhâra bey‘ ve deynlerini edâya kethüdâ ve nizâm ustalarını vekîl edip bu şurût düstûrü’l-amel tutulmak üzere başmuhâsebeye kayd ve mûcebince emr-i âlî sâdır olmağın işbu mu‘âyene olunan i‘lâm-ı şer‘î nâtık olduğu üzere mahmiyye-i İstanbul hısnı ebvâbından Yedikule hâricinde vâki‘ altı horoslu bir bâb değirmen ve ana merbût bir bâb habbâz fırını derûnunda mevcûde âlâta mâlik Mühtedî İbrahim ve Kirkor ve Mardik ve kapancıları Mığırdıç zimmîlerin müddet-i ma‘lûmede cânib-i mîrî ve tüccâra bi’l-iştirâ semen-i hıntadan cem‘an deynleri olan beş bin altı yüz yirmi beş guruşu edâya kudretleri olmayıp ba‘de’l-i‘lâm firâr etmeleriyle teb‘an li’l-emri’l-âlî ve ber-mûceb-i şurût ve nizâm vekâlet-i mezkûra binâ’en deyn-i mezkûru edâ içün zikr olunan fırın ve değirmen derûnlarında mevcûde âlât-ı lâzıme-i ma‘lûmelerini beş bin altı yüz yirmi beş guruşa mezbûr es-Seyyid Mustafa Ağa’ya bey‘ ve temlîk ve teslîm ol dahî iştirâ ve temellük ve tesellüm ve kabûl ve semen-i mezkûrdan cânib-i mîrîye deynleri olan üç yüz seksen dört buçuk guruşu beher haftada otuzar guruşdan on üç haftada tüccârdan isimleri mezkûr kimesnelere ber-mûceb-i defter-i müfredât deynleri olan beş bin iki yüz kırk buçuk guruşun dahî iki bin guruşunu ber-vech-i peşîn ve bâkî üç bin iki yüz kırk buçuk guruşun nısfını altı ay tamâmında ve nısf-ı âhârı senesi tamâmında edâya ta‘ahhüd ettikde anlar dahî râzılar oldu deyü âlât-ı lâzıme-i mezkûre mezbûr es-Seyyid Mustafa Ağa’nın uhdesinde olup ba‘dezîn merkûmûndan biri zuhûr ve âlât-ı mezkûre içün mezbûr es-Seyyid Mustafa Ağa’ya ta‘arruz eder ise te’dîb olunmak üzre başmuhâsebeye kayd ve yedine sûret i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 15 min Zilka‘de sene 1202.