İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 201 Hüküm no: 211 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmâm Hasan Efendi’nin vakıf malından harcadıklarını, mütevelli Mustafa’ya ödemesinin talep edildiği Ma‘rûz Hâmiş-i arzuhâlde muharrer derkenâr nâtık olduğu üzere saray-ı cedîd-i âmire ağası nezâretinde olup Âsitâne-i aliyye’de ve Çerkes kazâsında vâki‘ bevvâb-ı sultânî el-Hâc Hasan Ağa nâm sâhibü’l-hayrın hayâtında binâ ve ihyâ eylediği çeşme ve câmi‘-i şerîf ve kazânın evlâdiyet ve meşrûtiyet üzre mütevellisi arzuhâl eden Mustafa b. Mustafa b. Hasan sâdır olan emr-i âlîlerine imtisâlen Harameyn-i muhteremeyn müfettişi müderrisîn-i kirâmdan es-Seyyid Abdülhalim Efendi dâ‘îleriyle dâ‘îhânede bi’l-ma‘iyye ma‘kûd meclis-i şer‘-i şerîf-i hatîr-i lâzımü’t-tevkîrde vakf-ı mezbûre bin yüz doksan yedi senesi Muharrem’i gurresinden bin yüz doksan dokuz senesi Zilhiccesi gâyetine gelince üç sene kâ’immakâm-ı mütevellî olan İmâm Hasan Efendi b. Mehmed mahzarında bi’t-tevliye takrîr-i kelâm edip kâ’immakâm-ı mezbûr Hasan Efendi’nin yedinde olan iki kıt‘a memhûrumu muhâsebe defteri nâtık olduğu üzere zamân-ı kâ’immakâmlığında vâki‘ olan mu‘accelât musakkafât-ı vakfı ve bi’l-cümle îrâdından makbûz ve mesârif-i vakfa masrûfundan bâkî yedinde bâki kalan bin üç yüz beş guruşu hîn-i azlinde bana teslim ben dahî bi’t-tevliye yedinden ahz u kabz ettikden sonra kâ’immakâm-ı mezbûr muhâsebe-i vakfı benim huzûrumda görmeyip gıyâbımda rü’yet etmekle defter-i muhâsebede bin iki yüz elli guruş Salih Ağa menzili mahlûl oldukda Sarrâf Tekfur ve Marat zimmîye dokuz yüz guruş harc-ı râh ve ta‘âmiye nâmıyle bana ve yüz guruş hüddâmiye nâmıyla ve yüz seksen guruş deyn-i vakf nâmıyla ihrâcâta idhâl ve ol mikdâr mâl-ı vakfı ahz u itlâf ve istihlâk etmekle taleb ederim deyü da‘vâ etmekle ilel-i şer‘iyye îrâdıyla def‘a tasaddî edip ve def‘-i mezkûrîni beyân edeceği mütehakkık olmağın bâ-vesâtat-ı muslıhîn kâ’immakâm-ı mezbûr ile nef‘an li’l-vakf beş yüz guruş üzerine sulh olduğumda ol dahî sulh-ı mezbûru kabûl ve mâ‘adâya müte‘allika bi’t-tevliye aslâ da‘vâ ve nizâ‘ım yokdur deyü ta‘ahhüd etmişidim elhâletü hâzihî kâ’immâkâm-ı mezbûr bedel-i sulh-ı mezkûr beş yüz guruşu bana edâ etmeyip hâlâ zimmetinde olmağla taleb ederim deyü ba‘de’d-da‘vâ ve’l-ikrâr alâ mûcib-i ikrârihî meblağ-ı mezkûr beş yüz guruşu mütevellî-i mezbûr Mustafa’ya edâ ve teslîme kâ’immakâm-ı merkûm İmâm Hasan Efendi’ye tenbîh olunduğu huzûr-ı âlîlerine i‘lâm olundu. Fî 9 min Zilka‘de sene 1202.