İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 203 Hüküm no: 213 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun ve kocası Osman Ağa’nın sebzeci dükkanlarındaki gedik hisselerini Hamza Beşe’ye kiraya verdikleri Ma‘rûz Derûn-ı arzuhâlde mezkûr el-Hâc Hasan b. Mustafa sâdır olan emr-i âlîlerine imtisâlen Harameyn-i muhteremeyn müfettişi müderrisîn-i kirâmdan es-Seyyid Abdülhalim Efendi dâ‘îleriyle bi’l-ma‘iyye dâ‘îhânede ma‘kûd meclis-i şer‘-i şerîf-i enverde müştereki Şerîfe Fatma Hatun’un zevci ve tarafından vekîli Osman Ağa hâzır olduğu hâlde takrîr-i kelâm edip mahmiyye-i İstanbul’da Bahçekapısı kurbünde vâki‘ Vâlide Sultân merhûmenin câmi‘-i şerîfi derûnunda vâki‘ bir bâb sebzeci dükkânı ve ittisâlinde vâki‘ bir bâb kebeci dükkânlarının her biri altı sehm i‘tibârıyla üçer sehmi benim ve birer sehmi müvekkile-i mezbûrenin ve iki sehmi dahî sâhib-i arzuhâl işbu meclisde hâzır Hamza Beşe’nin bi’l-icâreteyn bâ-re’y-i mütevellî tasarruflarımızda olup zikr olunan kebeci dükkânında beher şehr cümlemizin rızâsıyla altı buçuk guruş kirâ ile müste’cirimiz olmağın beher şehr hisselerimiz mikdârı kirâlarımızı müste’cir-i merkûmdan ahz edip ancak sebzeci dükkânı içün beynimizde münâza‘a vâkı‘a olmuşidi elhâletü hâzihî mârrü’z-zikr sebzeci dükkânından ben üç sehm hissemi beher şehr dört guruşa ve müvekkile-i mezbûre Fatma Hatun bir sehm hissesini beher şehr bir guruş on akçeye müşterekimiz mezbûr Hamza Beşe’ye îcâr eylediğimizde ol dahî isticâr ve kabûl edip ve beher şehr tamâmında üzerine edâsı lâzım gelen meblağ-ı mezkûru bize edâya bi’l-emr ve’l-kabûl işbu meclisde hâzır manav es-Seyyid Memiş Beşe b. Ali dahî kefîl ve zâmin oldu deyü eylediği bi’l-cümle takrîrini hâzırûn-ı merkûmûndan her biri tasdîk eyledikleri huzûr-ı âlîlerine i‘lâm olundu. Fî 8 min Zilka‘de sene 1202.