İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 203 Hüküm no: 214 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tulumba şeridci esnafının kılabdan bükmesinin imalatına dair nizam Ma‘rûz İstanbul’da tulumba şerîd işleyen esnâf mülhakâtından tulumba bükmesi ta‘bîr olunur kılâbdan bükmeci esnâfına mahsûr olan on beş aded dolaba mahsûs Mehmed Usta ve Ahmed Usta ve Refayil ve Hayım ve Yoseb ve Nito ve Salamon nâm Yahûdî ve Manas ve Volid ve Samayil ve Kerope ve Mardiros ve Karabet ve Repayil ve diğer Mardiros ve Küçük Manas nâm zimmî ustalar meclis-i şer‘-i şerîf-i enverde Kethüdâları Mustafa Ağa ve Yiğitbaşıları Ali Çelebi hâzır oldukları hâlde her biri takrîr-i kelâm edip bundan akdemce her birimiz kalfa ve şâkirdlerimiz kendi menzillerimizde sâkinler olup san‘atımız olan kılâbdan bükmesinin a‘lâsını pâk ve temiz harîr üzre a‘lâ kılâbdan ile ve evsat ve ednâsını betre? üzre evsat kılâbdan ile işleyip tamâm oldukda kethüdâmız ma‘rifetiyle iki başları temhîr ve bey‘a arz olunur iken gafleten cümlemiz esnâf-ı sâ’ire misillü bir mahalde sâkin olup i‘tibâr bulmak zannıyla Vezîr Hân’da odalar istikrâ ve zikr olunan on beş aded dolâblarımızı nakl ve iskân edip lâkin zikr olunan odaların kirâ ve levâzım-ı sâ’iresi bizi mesârif-i kesîreye mübtelâ edip rasîh-i vesâ odalara eyyâb u zehâbımız tazyi‘-i evkât olmağla cümlemize muzır olduğu zâhir olup ba‘de’l-yevm zikr olunduğu üzre a‘lâ bükmeyi a‘lâ kılâbdan ile harîr üzre ve evsat ve ednâsını evsat kılâbdan ile betre üzre işleyip ba‘de’l-itmâm kethüdâmıza iki başlarını temhîr ve bey‘a arz edip aslâ ve kat‘â hilâfına hareket etmeyüz deyü cezm ve ta‘ahhüd birle [57b] kemâ fi’s-sâbık kendi menzillerine nakl ve iskân etmelerine ruhsat verilmek ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 16 min Zilka‘de sene 1202.