İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 204 Hüküm no: 215 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Bey’e ait sed bahçesi duvarının, bitişiğindeki eve zarar vermesi sebebiyle tamir ve tecdidinin yaptırılması hususunda uyarıldığı Ma‘rûz Sâdır olan fermân-ı âlîlerine imtisâlen kıbel-i şer‘den mürsel İkinci Kâtib Merhabâzâde Mahmud Efendi hâssa mi‘mârı hulefâsından el-Hâc Ahmed Nurullah ve İsmail Halîfeler ile İstanbul’da Yerebatan Sarayı kurbünde Cezerî Kâsımpaşa mahallesinde vâki‘ Mahmud Bey’in sa‘âdethânesine varıp huzûr-ı Müslimînde ba‘de akdi’l-meclis menzil-i mezbûr ittisâlinde kâ’in bir bâb mülk menzile mutasarrıflar derûn-ı arzuhâlde isimleri mezkûr Şerîfe Âmine bt. Ali nâm hatun ve sadrî kebîr oğlu es-Seyyid Ahmed b. Osman meclis-i ma‘kûd-ı mezkûrda sâhib-i arzuhâl mûmâileyh Mahmud Bey mahzarında mûmâileyhin işbu derûnunda akd-i meclis olunan kadîm sed bahçesinin duvarı bizim menzilimizin duvarına muttasıl ve sedd-i mezkûrun rutûbeti duvardan neşf edip bizim menzilimizin sütûnları ve hâtılları fenâ bulmağla ol vecihle mazarratı def‘ olunmak murâdımızdır deyü bundan akdem da‘vâ sadedinde olmuşidik elhâletü hâzihî mûmâ[ileyh] Mahmud Bey sedd-i mezkûrun mevcûd duvarı yüzüne kendi tarafından altı zirâ‘ mahallini hafr ve muhkem horasan ile derz etmek üzre ta‘ahhüd edip bu sûretde sedd-i mezkûrun rutûbetinden neşfi sâkıt ve mazarratı mündefi‘ olmağın mi‘mârân-ı mezbûrân tahkîk etmeleriyle biz dahî râzı ve tasaddî eylediğimiz da‘vâmızdan fâriğler olduk dediklerinde mûmâileyh Mahmud Bey dahî bâlâda tafsîl olunduğu üzre zikr olunan sed bahçe duvarı yüzüne kendi tarafından altı zirâ‘ mahallini hafr ve muhkem derz etmek üzre ta‘ahhüd ve bu vecihle kat‘-ı nizâ‘ eylediklerini kâtib-i merkûm mahallinde ketb ü tahrîr ve ma‘an mürsel ümenâ’-i şer‘le meclis-i şer‘a inhâ eylediği İstanbul Mahkemesi’nden huzûr-ı âlîlerine i‘lam olundu. Fî 16 min Za. sene 1202.