İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 205 Hüküm no: 216 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Ağa’nın buğday bedelinden İstefan v. Kiragos’dan alacaklı olduğu Ma‘rûz Kapân tüccârından Abdülkadir Ağa b. el-Hâc Hüseyin meclis-i şer‘-i şerîf-i enverde yazıcısı es-Seyyid Mustafa b. es-Seyyid Hasan hâzır olduğu hâlde habbâz tâ’ifesinden mahrûse-i Galata’da mütemekkin İstefan v. Kiragos nâm zimmî ile terâfu‘larında benim mâlım olup Berber Ahmed Re’is nâm kimesnenin süvârîsi olduğu sefînede mahmûl hıntadan bin iki yüz bir senesi Ramazân-ı Şerîfi’nin on beşinci [günü] beher keyli doksan altı akçeye olmak üzere beş yüz keyl hıntamı mersûm İstefan zimmiye bey‘ ve temlîk ve yazıcı-ı mezbûr yediyle yevm-i mezbûrede sefîne-i mezkûrede teslîm ol dahî iştirâ ve temellük ve tesellüm ve kabûl ve semen-i mecmû‘-ı mezkûr dört yüz guruşun yüz yetmiş altı guruşunu yazıcı-ı merkûm yediyle bana edâ edip bâkî iki yüz yirmi dört guruşu zimmetinde kalmağla taleb ederim deyü ba‘de’d-da‘vâ ve’l-istintâk mersûm İstefan cevâbında müdde‘î-i mezbûrun sefîne-i mezkûrede mahmûl hıntasından târîh-i mezkûrede ancak iki yüz altmış keyl hınta iştirâ edip semeninden teslîm eylediği meblağdan bâkî zimmetinde otuz [58a] iki guruş deyni olduğunu ikrâr mâ‘adâsı olan iki yüz kırk keyl hınta iştirâ eylediğini inkâr edip ve müdde‘î-i mezbûr ziyâde müdde‘âsını beyândan izhâr-ı acz ve talebiyle mersûm İstefan muvâcehesinde ba‘de’t-tahlîf mûcibince müdde‘î-i mezbûr Abdülkadir Ağa mersûm İstefan zimmînin ikrârından ziyâde mutâlebesiyle bilâ beyyine mersûm İstefan zimmîye mu‘âraza etmemek üzere tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 16 min Zilka‘de sene 1202.