İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 206 Hüküm no: 218 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın süt bedelinden Yovan’dan alacaklı olduğu, Yovan’ın kaçması sebebiyle kefili Hristo’dan talep edildiği Ma‘rûz Arzuhâl eden Mustafa Ağa b. Hüseyin meclis-i şer‘-i münîrde Yovan v. Tanaş nâm zimmî ile terâfu‘larında yedimde mülküm olup havâss-ı refî‘a kazâsına tâbi‘ Çilingir karyesinde kâ’in çiftliğimde mevcûd manda ineği mahsûlünden beher kıyyesi üçer pâreye olmak üzere bin iki yüz bir senesi rûz-ı Hızırı’ndan rûz-ı Kasımı’na gelince mersûm Tanaş zimmînin iltimâsıyla gâ’ib ani’l-meclis Hristo nâm zimmîye üç bin vakıyye süd verip ol dahî kabz ve semeninden edâsı lâzım gelen iki yüz yirmi beş guruşu bana edâya bi’l-emr ve’l-kabûl mersûm Tanaş zimmî kefîl ve zâmin olup mersûm Hristo zimmî zikr olunduğu vech üzre yedimden müşterâ ve makbûz üç bin vakıyye süd semeninden zimmetinde bana deyni olan iki yüz yirmi beş guruşu bana edâ etmeyip firâr etmekle meblağ-ı mezkûru kefâletine binâ’en mersûm Tanaş zimmîden taleb ederim deyü târîh-i i‘lâmdan otuz iki gün mukaddem ba‘de’d-da‘vâ ve’l-inkâr müdde‘î-i mezbûr Şahin havâle olunup lâkin mersûm Tanaş zimmî dahî firâr ve gaybet eylediğini Abdullah b. Ali ve Ömer b. Ahmed ve Halil b. Ali nâm Çilingir karyesi ahâlîsinden mevsûkun bih kimesneler haber verdikleri ma‘lûm-ı devletleri buyuruldukda olbâbda emr hazret-i men lehü’l-emrindir. Fî 20 min Zilka‘de sene 1202.