İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 206 Hüküm no: 219 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni sarrâc ürünlerinin Saraçhâne’de eski olanların ise Bitbazarında satılmaları hakkında sarrâc esnafı nizamı Ma‘rûz Âsitâne-i aliyye’de vâki‘ Saraçhâne-i kebîr Kethüdâsı Salih Usta ve Yiğitbaşı Hüseyin Usta ve Bölükbaşı İbrahim Usta ve es-Seyyid el-Hâc Ali Usta ve Mustafa Usta ve el-Hâc Molla Mehmed Emin Usta ve Karahisârî Mustafa Usta vesâ’ir mazbûtü’l-esâmî ustalar [58b] meclis-i şer‘-i şerîf-i enverde Bitbazârı Kethüdâsı Yusuf Ağa ve el-Hâc Abdullah Ağa ve Mehmed Ağa vesâ’ir mazbûtü’l-esâmî kimesneler ile terâfu‘larında işbu yedimizde olan merhûm ve mağfûrun leh garîk-i bahr-ı gufrân Ebu’l-Feth Sultân Mehmed Hân -aleyhi rahmetü’r-rahmân- hazretlerinin bi-avni Sübhân işbu belde-i tayyibeyi feth ve kabza tasarruf-ı İslâmiye’ye teshîr buyurdukları âvân-ı nusret-fercâmda Saraçhâne-i Kebîr’i binâ ve inşâ edip bezâzistân havâlîsinde sâkin bi’l-cümle sarrâc esnâfını mahall-i merkûme nakl ve iskân ve serc ve licâm ve bi’l-cümle sarrâc esnâfına mahsûs olan cedîd eşyâ Saraçhâne’de bey‘ u şirâ oluna andan gayrı mevâzi‘de san‘at-ı mezkûre müte‘allika eşyâdan aslâ bir nesne alınmaya ve satılmaya deyü şurût ve kuyûd ile rabt ve düstûrü’l-amel tutulmak içün yedlerine hükm-ı hümâyûn i‘tâ edip Fâtîh-i merhûm -tâbe serâhu- hazretlerinin hükm-ı hümâyûnları vech üzre amel olunup hilâfından mücânebet ve hazer olunmak bâbında selâtîn-i mâziye eskenehümullâh fî cenneti âliye zamânlarında dahî hutût-ı hümâyûnla mu‘anven evâmir-i aliyyeler inâyet ve ihsân olunup ve hâlâ emîrü’l-mu’minîn sultânü’l-muvahhidîn zıll-ı zalîlü’llâh-ı pâdişâh-ı âlem-penâh -edâmallâhu mülkehû ve devletehû ilâ yevmi’l-kıyâm- hazretleri dahî ecdâd-ı i‘zâmları verdiği hükm-ı hümâyûnu mü’eyyed bâlâsı hatt-ı hümâyûnla müveşşah işbu emr-i âlîşânı yedimize i‘tâ buyurmuşlar iken Bitbazârı ahâlîleri itâ‘at etmeyip sarrâc tâ’ifesine mahsûs olan cedîd ve köhne serc ve licâm ve eşyâ-i sâ’ireyi muhallefât-ı mevtâdan bi’l-müzâyede iştirâ eyledik deyü dükkânlarına vaz‘ ve bey‘ edip bi’d-defâ‘at merkûmlar lede’l-murâfa‘a men‘ olunduklarından mâ‘adâ bin yüz doksan beş senesi İstanbul Kadısı Paşmakcızâde es-Seyyid Numan Efendi huzûrunda dahî merkûmlar ile murâfa‘ ve kemâ fi’l-evvel ber-mûceb-i hutût-ı hümâyûn men‘-i ekîd olunmuşlar iken yine itâ‘at etmeyip hâlâ eşyâ-i mezkûrenin bey‘ u şirâsına ta‘arruzdan hâlî olmamalarında esnâfımıza fütûr hâsıl ve umûr-ı mühimme-i mîriyenin ta‘tîline bâ‘is olmalarıyla merkûmların ol vecihle tasaddîleri kemâ fi’s-sâbık men‘ olunmak murâdımızdır deyü min külli’l-vücûh takrîr-i meşrûhlarına mutâbık senedât-ı şer‘iyye ve bâlâları husûs-ı hümâyûnla müveşşah evâmir-i aliyye ibrâzıyla iştikâ eylediklerinde Bitbazârı ahâlîleri mezâmîn-i senedât-ı şer‘iyye ve evâmir-i aliyyeleri ve serc ve licâm ve merkûmlara mahsûs eşyâ-i sâ’ireyi dükkânlarında bey‘ u şirâ eylediklerini tav‘an ikrâr ve i‘tirâf edip lâkin sarrâclara mahsûs olan ancak cedîddir köhne serc ve licâm ve eşyâ-i sâ’ireyi öteden beru biz bey‘ u şirâ ederiz deyü hilâf-ı senedât-ı şer‘iyye ve muğâyir-i evâmir-i aliyye kavl-i mücerredlerine binâ’en sarrâc esnâfına eyledikleri tasaddîleri müvecceh ve iltifâta şâyân olmayıp mücerred hoşnutlarından nâşî olunduğu [59a] zâhir olmağın fîmâ ba‘d hilâf-ı senedât-ı şer‘iyye ve muğâyir-i hutût-ı hümâyûn ve evâmir-i aliyye sarrâclara mahsûs cedîd ve köhne ve licâm ve eşyâ-i sâ’irelerini dükkânlarında ve mevâzi‘-i sâ’irede sarrâclara mahsûs cedîd ve köhne serc ve licâm ve eşyâ’-i sâire bey‘ u şirâ etmemek üzre tenbîh-i ekîd birle tekrâr ba‘de’t-tenbîh Bitbazârı ve Sipâhbazârı ve oturakçılar dükkânlarında ve mevâzi‘-i sâ’irede sarrâclara mahsûs cedîd ve köhne serc ve licâm ve eşyâ-i sâ’ire bey‘ u şirâ olunmayıp ta‘arruz eder olur ise eben? men kâne yeniçerileri ağası tarafından ta‘yîn yazıcı ma‘rifetiyle ahz u te’dîb olunmak bâbında sarrâc esnâfı yedlerine bir kıt‘a tuğrâlı emr-i âlî inâyet ve ihsân buyurulmak ricâsında oldukları huzûr-ı âlîlerine i‘lâm olundu. Fî 17 min Zilka‘de sene 1202.