İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 208 Hüküm no: 220 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markar v. Mığırdıç’ın kiracı olarak bulunduğu bezâz dükkanının kira bedelini vekil Hafız Ali Efendi’ye teslim ettiği Ma‘rûz Derûn-ı arzuhâlde mezkûr Markar v. Mığırdıç nâm zimmî meclis-i şer‘-i şerîf-i enverde zikri âtî bezâz dükânının mutasarrıfları Numan Efendi ve hemşîresi Hibetullah Hatun ve sagîr karındaşları Mehmed Tahir ve Mehmed Arif ve Ali ebnâ-yı İsmail vâlideleri ve vasîleri Saraylı Emine Hatun bt. Abdullah taraflarından sâbitü’l-vekâle vekîlleri Hâfız Ali Efendi b. Ahmed mahzarında merkûmûn Numan Efendi ve karındaşları Hibetullah Hatun ve Mehmed Tahir ve Mehmed Arif ve ebnâ-yı İsmail’in tasarruflarında olup benim müşâhereten müste’ciri olduğum Cevâhir Bezâzistan’ı kurbünde Takiyyeciler Kapısı civârında kâ’in Ayasofya-i Kebîr Vakfı’ndan bir bâb bezâz dükkânının beher şehr beşer guruşdan târîh-i i‘lâm senesi Şevvâl’i gâyetine gelince zimmetimde müctemi‘a olan on beş aylık yetmiş beş guruş kirâlarını vekîl-i merkûm Hâfız Ali Efendi’ye teslîm ol dahî kabz edip ve dükkân-ı mezkûru kemâ fi’s-sâbık beher şehr beşer guruşa bi’l-vekâle bana îcâr ben dahî istîcâr ve kabûl eyledim deyü eylediği bi’l-cümle takrîrini vekîl-i merkûm Hâfız Ali Efendi tasdîk eylediği huzûr-ı âlîlerine i‘lâm olundu. Fî 7 min Zilka‘de sene 1202.