İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 208 Hüküm no: 221 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sebzeciler ile bahçıvanların birbirlerinin işlerine karışmamaları Ma‘rûz Arzuhâl eden Sebzeci Esnâfı kethüdâsı es-Seyyid Mehmed Emin sâdır olan fermân-ı âlîlerine imtisâlen Çarşamba günü Dîvân-ı âlî’de ba‘dehû du’âhânede ma‘kûd meclis-i şer‘-i münîrde İstanbul ve havâlîsinde vâki‘ Bahçıvanlar Kethüdâsı İsmail mahzarında takrîr-i kelâm edip kethüdâları olduğum yüz altmış dört aded dükkân ashabı olan sebzeci tâ’ifesinin beher yevm dükkânlarında bey‘ ve ta‘yînâtlarına vermek içün Eminönü’nde Sebzehâne iskelesinde bahçıvan tâ’ifesinden narh-ı cârîsi üzere iştirâ eyledikleri envâ‘-ı sebzeyi beyinlerinde tevzî‘ ve taksîm etmek benim umûrumdan iken bahçıvanlar kethüdâsı merkûm İsmail müdâhale ve beni men‘ eder deyü bu esnâda bi’d-defâ‘at mu‘âraza ve münâkaşa etmişidik elhâletü hâzihî mezbûr Kethüdâ İsmail Ağa sebzeci esnâfı beyninde olan tevzî‘ ve taksîme ve esnâf-ı mezbûrînin birinin umûruna karışmayıp ve merkûmlardan bir nesne mutâlebe etmemeğe ta‘ahhüd eyledikde ben dahî bahçıvan tâ’ifesinin umûruna karışmayıp ve nesne mutâlebe etmemeğe ta‘ahhüd ve her birimiz bu vecihle mu‘âhedeye râzılar ve min ba‘d hilâf-ı mu‘âhede hareket eder olur ise yazıcımız Mehmed Said Efendi ma‘rifetiyle ahz ve bâ-i‘lâm te’dîb oluna deyü eylediği takrîr-i meşrûhunu mezbûr Kethüdâ İsmail Ağa tasdîk edip yedlerine ber-vech-i muharrer başka başka birbirinden müstensih emr-i âlî ricâsında oldukları huzûr-ı âlîlerine i‘lâm olundu. Fî 25 min Zilka‘de sene 1202.