İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 209 Hüküm no: 222 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb taifesinin İstanbul’a getirdikleri koyunların kesildikten sonra kaç paraya hangi esnafa satılacağı Ma‘rûz Bu def‘a Anadolu cânibinden ağnâm-ı celeb ve tesyîr eden celebân tâ’ifesinden ve Cihan Bey Aşîreti’nden Ebubekir b. el-Hâc Yusuf meclis-i şer‘-i şerîf-i enverde Kasabbaşı Mehmed Emin Ağa tarafından vekîli Yedikule Kasabları Kethüdâsı el-Hâc Ali ve Eğrikapı Kasabları Kethüdâsı Ebubekir Ağa ve hâlâ sekbanbaşı ağa tarafından vekili yazıcı miyâne Mehmed Efendi hâzır oldukları hâlde kasab ustalarından Ebubekir Ağa ve Said Ağa ve Derviş Ağa ve es-Seyyid Mehmed Ağa ve Osman Ağa ve el-Hâc Ömer Ağa ve İsmail Ağa ve Girîdî Mehmed Ağa ve Hacı Odabaşı vesâ’ir mazbûtü’l-esâmî ustalar mahzarlarında takrîr-i kelâm edip işbu sene-i mübârekede Anadolu cânibinden mâlım ile celb ve iştirâ ve Âsitâne-i aliyye nakl ve tesyîr edip hâlâ medîne-i Üsküdar havâlîsinde mevcûde Karaman ta‘bîr olunur sekiz yüz re’s bir sürü ve beş yüz re’s bir sürü cem‘an bin üç yüz re’s ağnâmın ba‘de’z-zebh beher vakıyye lahmın yedi pâreye ve sakad ta‘bîr olunur deri ve baş ve ayak ve ciğerini on pâreye ve kuyruk yağının beher vakıyyesini on sekiz pâreye vermek üzre kasabbaşı ağa ile mukâvele olunup kasab ustalarına arz olundukda anlar dahî sakad ta‘bîr olunur deri ve baş ve ayak ve beş pâre iki akçeden ziyâde tutmaz ve kuyruklar dahî havalar gâyet hâr olup bey‘i batî olmağla müte‘âffin olup mumculara verilmeden gayrı çâre olmamağın beher vakıyyesi yedi pâre eder ve ağnâm-ı mezkûr Üsküdar’da olduğundan Âsitâne’ye nakl olunca beher re’sine üçer pâre masraf gider ve beher re’s ağnâma beşer pâre ve mürde ta‘bîr olunur mesârif-i zâdemiz dahî olmağla hasârât-ı küllî hâsıl olup bir vecihle tahammüle mecâlimiz yokdur deyü şirâdan imtinâ‘ edip fi’l-vâki‘ hâl minvâl-i muharrer üzere olduğu benim dahî ma‘lûm ve meczûmum olmağın rızâmla zikr olunan ağnâmlarımın ba‘de’z-zebh beher kıyye lahmını narh-ı cârîsi üzere yedişer pâreye ve sakad ta‘bîr olunur deri ve baş ve ayaklarını ve ciğerini yedi pâreye ve beher kıyye kuyruk yağını dahî on altı pâreye kasab ustalarına bey‘ edip anlar dahî iştirâya râzılar oldu deyü eylediği bi’l-cümle takrîrini hâzırûn-ı mezbûrûn ve ustalar tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî 18 min Zilka‘de sene 1202.