İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 210 Hüküm no: 224 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeço v. Papa Simo’nun kasap dükkanlarındaki gedik hisse ve aletlerini Mehmed Said, Hristo, Panko ve Kosta’ya sattığı Ma‘rûz Evkâf-ı hümâyûn-ı hazret-i şehriyârîden Birinci Selhhâne’ye merbût olup mahrûse-i Galata’ya muzâfa kasaba-i Tophâne’de mahkeme köşesinde vâki‘ bir bâb Vimalı Hamâm kurbünde selhhâne önünde vâki‘ bir bâb debbâğhâne kurbünde vâki‘ bir bâb ki cem‘an üç bâb kasab dükkânları derûnlarında mevcûde olup beyne’l-esnâf gedik ta‘bîr olunur lâzımelerin on iki sehm i‘tibârıyla on bir sehmine mütevellî-i vakf temessüküyle mutasarrıf Çeço v. Papa Simo nâm zimmî meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli Mehmed Said Ağa b. Abdülgani vesâ’ir ustalar hâzır oldukları hâlde Hristo v. Yani ve Panko v. Dimo ve Kosta v. Preşkova muvâcehelerinde takrîr-i kelâm edip zikr olunan üç bâb dükkân derûnunda mevcûde âlât-ı lâzımelerin on iki sehm i‘tibârıyla bir sehmi işbu meclisde hâzır Sava v. Lefteri nâm zimmînin ve on bir sehmi benim tasarrufumda olmağla ben zikr olunan üç bâb dükkândan on bir sehm hissemin üç sehmini kendi nefsim içün ibkâ ve atîk temessükâtlarını yedimde hıfz edip bâkî sekiz sehmin iki sehmini merkûm Mehmed Said Ağa’ya ve iki sehmini mersûm Hristo zimmîye ve üç sehmini mesfûr Panko zimmîye ve bir sehmini mersûm Kosta zimmîye kendi hüsn-ı rızâ ve tayyib-i ihtiyârımla bedel-i ma‘lûm ve makbûz mukâbelesinde ferâğ ve tefvîz eylediğimde anlar dahî her biri ber-vech-i muharrer tefevvüz ve kabul etmeleriyle ba‘de’l-yevm zikr olunduğu vech üzere âlât-ı lâzıme-i mezkûrelerin zikr olunduğu vech üzere iki sehmi merkûm Mehmed Said Ağa ve iki sehmi Hristo zimmî ve üç sehmi mersûm Panko zimmî ve bir sehmi mersûm Kosta zimmî üzerlerine defter-i vakfa kayd ve yedlerine başka başka temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî selh-i Zilka‘de sene 1202.