İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 211 Hüküm no: 225 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan Ağa’nın ekmekçi esnafına yaptığı zulüm ve kötülüklerden dolayı ekmekçilik mesleğinden çıkarıldığı Ma‘rûz Arzuhâl eden nişâncı esnâfı kethüdâları Osman ve ustalarından Süleyman ve Ahmed ve Emrullah ve Mardiros ve Manas ve Rebayil ve İsayi ve Mıgır ve Kerope ve Kirkor’dan her biri meclis-i şer‘-i şerîf-i enverde esnâf-ı mezbûrdan Molla Hasan Ağa b. Süleyman mahzarında mezbûr [60b] Molla Hasan hadîdü’l-lisân ve tama‘kâr olup kendi hâliyle meşgûl ve kâr-ı kesbine kanâ‘at etmediğinden cümlemiz kendiden dil-gîr olmamız ile bundan akdem merkûmu huzûr-ı şer‘a ihzâr ve takrîr-i hâl edip ol dahî yedimizde olan sicilden muhrec i‘lâm-ı şer‘î nâtık olduğu vech üzre umûrumuza müdâhale etmeyip kendi kâr u kesbine kanâ‘at etmeğe ta‘ahhüd etmişidi lâkin ahd-i mezkûrîne bir vecihle vefâ etmeyip yevmen fe-yevmen hiddet ve şiddeti terakkî bulmağla cümlemizi ta‘cîz ve tekdîrden hâlî olmadığından mâ‘adâ nişasta i‘mâl olunmak içün iştirâ olunan yaş hıntayı beynimizde tevzî‘ ve umûrumuzu rü’yet kethüdâmızın umûrundan iken müdâhale birle umûrumuzu muhtel ve tevzî‘i dahî kendi dilediği vech üzere edip her birimizin bir gûne zarar ve hasarâtına sebeb ve bir dürlü kendiden emn ve râhatımız olmamağın merkûm derûnumuzdan hurûc ve mekseb-i âhara şürû‘ etmek murâdımızdır deyü eyledikleri bi’l-cümle takrîr-i meşrûhları vâkı‘a mutâbık olduğunu Habbâzân Kethüdâsı İsmail Ağa ve nizâm ustalarından Ahmed Ağa ve Kadir Ağa ve Seyyid Ömer Ağa es-Seyyid Süleyman Ağa ve Mehmed Beşe ve Ebubekir Beşe ve Molla Kemal ve sâ’ir mevsûku’l-kelim mazbûtü’l-esâmî ustalar merkûm Molla Hasan muvâcehesinde alâ tarîkı’ş-şehâde haber vermeleriyle mûcibince fîmâ ba‘d esnâf-ı mezbûre derûnundan hurûc ve mekseb-i âhara şürû‘ etmek üzre merkûm Molla Hasan’a tenbîh olunduğu huzûr-ı âlîlerine i‘lâm olundu. Fî selh-i Zilka‘de sene 1202.