İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 214 Hüküm no: 230 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mar Yakub Vakfı’na ait evi Çömlekçizade Mehmed Efendi Vakfı’na ait olduğu gerekçesiyle kullanan Tütüncü Ohannes’in gerçek sahiplerine iade etmesi Sâdır olan fermân-ı âlîlerine imtisâlen kıbel-i şer‘den mürsel İkinci Kâtib Merhabâzâde Mahmud Efendi ve nezâret-i hazret-i şeyhü’l-islâmîde âsûde evkâf müfettişi müderrisîn-i kirâm zevi’l-ihtirâmdan Salih İsmail Efendi mürsel müderrisîn-i kirâmdan Abdülkadir Efendi hâssa mi‘mârı hulefâsından Hâfız İsmail ve diğer İsmail ve es-Seyyid Mehmed Sadık Halîfeler ile mahrûse-i Galata’ya muzâfa kasaba-i Beşiktaş’da Abbas Ağa mahallesinde vâki‘ münâza‘un fîh olan menzile varıp Müslimîn huzûrlarında akd-i meclis-i şer‘-i kavîm eylediklerinde nezâret-i dâ‘îlerinde olan evkâfdan derûn-ı arzuhâlde mezkûr Kudüs-ı Şerîf’de Mar Yakub Vakfı’nın kâ’immakâm-ı mütevellîsi Papa Kirkor v. Sekyas meclis-i ma‘kûd-ı mezkûrda nezâret-i hazret-i şeyhü’l-islâmîde âsûde evkâfdan Çömlekçizâde Mehmed Efendi Vakfı’nın mütevellîsi el-Hâc Ali Ağa b. el-Hâc Mustafa ile zikri âtî menzile vaz‘-ı yedi mütehakkık olan arzuhâl eden Tütüncü Ohannes v. Kazar zimmî muvâcehelerinde Sarrâf Arotin v. Arakil ve sulbî oğlu Arakil zimmîler hâzır oldukları hâlde işbu derûnunda akd-ı meclis-i şer‘ olunan bir tarafdan zikr olunan Mar Yakub Vakfı’ndan Asvador zimmî tasarrufunda olan menzil ve ba‘zan Yenaki zimmî menzili ve bir tarafdan zikr olunan Çömlekçizâde Mehmed Efendi Vakfı’ndan mersûm Tütüncü Ohannes zimmî tasarrufunda olan menzil ve bir tarafdan Kazaros zimmî menzili ve bir tarafdan tarîk-i âm ile mahdûd fevkânî üç bâb oda ve bir kenîf ve iki sofa ve bir matbah ve tahtânî iki bâb oda ve bir sofa ve bir matbah ve iki tahta mahzen ve iki kenîf ve bir bi’r-i mâ’ ve eşcâr-ı müsmireli bir mikdâr bahçeyi muhtevî bir bâb mülk menzil Peraybon nâm Nasrâniye’nin mülkü iken mersûme Peraybon Nasrâniye menzil-i mezkûr bin yüz elli iki senesinde Agya v. Aleksan nâm zimmîye semen-i ma‘lûma bey‘ ve teslîm ol dahî bin yüz elli yedi senesinde Sarrâf Matos v. Kenan zimmîye kezâlik mülkiyet üzere bey‘ ve teslîm ol dahî ba‘de’l-iştirâ yedinde mülkü iken hâlik oldukda veresesi zevcesi Maryem ile kebîre kızı Horosbima Nasrâniye’ye ve li-ebeveyn er karındaşı Kigork zimmîye mevrûs oldukdan sonra verese-i mezburân Maryem Kigork hisse-i ırsiyyelerini mersûme Horosbima Nasrâniye’nin yüz seksen senesinde bey‘ ve teslîm ol dahî ba‘de’l-iştirâ menzil-i mezkûr mersûme Horosbima Nasrâniye yedinde irsen ve şirâren mülkü iken bin yüz doksan üç senesinde kâ’immakâm mütevellîsi olduğum sâlifü’z-zikr Mar Yakub Kinisası Vakfıçün bana semen-i ma‘lûma bey‘ ve teslîm ben dahî iştirâ ve kabz edip menzil-i mezkûr hâlâ ber-mantûk-ı [62a] temessük bi’l-icâreteyn mersûmân Sarrâf Arotin ve oğlu Erakil zimmîlerin ale’l-iştirâk taht-ı tasarruflarında iken menzil-i mezkûrun fevkânî bir sedli sofa ve bir kenîf ve tahtânî bir sofa ve bir kenîfi hâvî tûlen yedi zirâ‘ iki parmak ve arzen altı zirâ‘ on sekiz parmak terbî‘an kırk yedi zirâ‘ on sekiz parmak arsalı mahall-i mu‘ayyeni merkûm Çömlekçizâde Mehmed Efendi Vakfı’ndan olmak zu‘mıyla mesfûr Ohannes zimmî fuzûlî vaz‘-ı yed ve zabt etmekle mahall-i mezkûrdan keff-i yedine tenbîh olunmak matlûbumuzdur deyü kâ’immakâm-ı merkûm ile hâzırân-ı mersûmân ma‘an da‘vâ ettiklerinde ol dahî cevâbında Çömlekçizâde Mehmed Efendi Vakfı’ndan olmak üzere vaz‘-ı yedini ikrâr mâ‘adâyı inkâr etmekle müdde‘ûn-ı mesfûrûn ber-vech-i muharrer müdde‘âlarını lede’t-tezkiye adl ve makbûlü’ş-şehâde eyledikleri zâhir olan Kayıkçı Mehmed Emin Beşe b. Abdullah ve Aşcıoğlu İsmail b. Hüseyin ve Odabaşıoğlu Kolancı Ömer Beşe b. Mehmed ve Süleyman b. Veliyyüddin nâm kimesneler şehâdetleriyle vech-i şer‘î üzere isbât etmeğin mûcibince mahall-i mu‘ayyen-i mezkûrdan keff-i yed ve med‘uvvûn-ı mesfûrûna teslîme mesfûr Tütüncü Ohannes zimmîye tenbîh eylediklerini mevlânâ-yı mezbûrân mahallinde ketb ve tahrîr ve ma‘an mürsel ümenâ’-i şer‘le meclis-i şer‘a gelip inhâ ve takrîr eyledikleri huzûr-ı âlîlerine i‘lam olundu. Fî 28 min Zilka‘de sene 1202.