İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 215 Hüküm no: 231 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazzâz esnâfının nizamına müdahaleden dolayı hapse atılan Kör Ahmed’in aile fertlerine bakabilmesi ve Kurban Bayramı sebebiyle affedilmesinin talep edildiği Âsitâne-i aliyye’de vâki‘ gazzâz esnâfına mülhak ve esnâf-ı mezbûrenin ücret ile amel eder ma‘mûllerinden olup Fazlıpaşa Sarayı’nda sâkinler ibrişim bükücü tâ’ifesinden Ketigon ve Lazari ve Petro ve Trandafil ve Kaspar ve Çınar Bogos ve Laz Vasil ve Matos ve Aknados ve Agya ve Kaspar ve Şişman Kabril ve Sahak ve Hacador ve Abram nâm zimmîler meclis-i şer‘-i şerîf-i enverde Gazzâzlar Kethüdası Ömer Usta ve Gazzâzbaşı Mustafa Ağa ve Yiğitbaşı Mehmed Odabaşı hâzır oldukları hâlde her biri takrîr-i kelâm edip ibrişim bükücü tâ’ifesinden Kör Ahmed nâm kimesne kendi hâlinde olmayıp dâ’imâ bizi igfâl ve müstakil esnâf olup başka kethüdâ nasb olunmağla dilediğimiz vech üzere hareket ederiz deyü şurût ve nizâmımıza muğâyir eylediği etvâr ve akvâl-i vâkı‘âsından nâşî bi’l-cümle gazzâz esnâfının iltimâsıyla bundan akdem li-ecli’t-te’dîb bâ-i‘lâm kal‘a bend olmuşidi lâkin merkûm Kör Ahmed dahî iyâli ve fakîrü’l-hâl olup medâr-ı ta‘ayyüşe adem-i iktidârları olmağın fîmâ ba‘d derûnumuza dâhil olmayıp ve ibrişim bükücü kârına müdâhale etmeyip mekseb-i âhara şürû‘ ve evlâd-ı iyâlini infâk edeceğine her birimiz tekeffül ve derûnumuza dühûl etmemesine ta‘ahhüd ettiğimizde cümle ustalar dahî bu vecihle merkûmun ıtlâkına râzılar oldular deyü eyledikleri bi’l-cümle takrîr-i meşrûhlarını tasdîk ve merkûm Kör Ahmed’in î‘d-i edhâ hürmetine sebîli tahliye olmasını istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 5 min Zilhicce sene 1202.