İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 216 Hüküm no: 232 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sagome bt. Karabet’in kendisini Kudüs’e götürmesi şartıyla vakıf evin yarım hissesini oğlu Serope’ye feragatinin caiz olmaması sebebiyle Serope’nin ev hissesini Sagome’ye geri vermesinin emredildiği Ma‘rûz Arzuhâl eden sahsı mu‘arrefe Sagome bt. Karabet nâm Nasrâniye meclis-i şer‘-i şerîf-i enverde sadrî kebir oğlu Serope v. Avanes nâm zimmi ile terâfu‘larında ashâb-ı hayrâtdan Küçük İsmail Ağa Vakfı’nın mütevellîsi Mustafa Ağa tarafından vekîli es-Seyyid Hüseyin b. Hasan hâzır olduğu hâlde vakf-ı mezkûr musakkafâtından olup Ayvansaray kapısı dâhilinde Atîk Mustafapaşa mahallesinde vâki‘ beyne’l-ahâlî ve’l-cîrân ma‘lûmü’l-hudûd ve’l-müştemilât bi’l-icâreteyn mutasarrıfa olduğum bir bâb vakf menzilin nısfını bin yüz doksan senesi beni Kudüs-ı Şerîf’e götürüp ölünce bana bakmak şartıyla oğlum mersûm Serope zimmîye bâ-re’y-i mütevellî ferâğ edip lâkin şartıyla ferâğ-ı mu‘teber olmamağın nısf menzil-i mezkûru kemâ fi’l-evvel tasarrufuma istirdâd ederim deyü ba‘de’d-da‘vâ ve’l-istintâk mersûm Serope zimmi cevâbında menzil-i mezkûr harâb ve mâ’il-i türâb olmağla anam mersûme menzil-i mezkûru bi’l-külliye ta‘mîr ile masrûfunu veririm deyü bana emr etmekle ben dahî emr-i mezkûra binâ’en menzil-i mezkûru ta‘mîr ve iktizâ eden keraste ve mismâr ve ücret-i amele ve mesârif-i sâ’iresine mâlımdan altı yüz guruş sarf etmemle meblağ-ı mezkûr mukâbelesinde bana bilâ-şart ferâğ etmişidi deyü da‘vâ ve her biri âharın müdde‘âsını inkâr edip mersûmândan her biri ber-vech-i muharrer müdde‘âsını beyâna havâle olundukda mersûme Sagome minvâl-i muharrer üzere müdde‘âsını lede’t-tezkiye adâletleri zâhir Müezzin Molla Mehmed b. İsmail ve Kahveci Ali Alemdâr b. Halil şehâdetleriyle mersûm Serope muvâcehesinde ber-nehc-i şer‘î isbât edip mersûm Serope zimmî müdde‘âsına ikâmet-i beyyine etmeyip tahlîfe dahî tâlib olmamağın mûcibince nısf menzil-i mezkûru bâ-re’y-i mütevellî müdde‘iyye-i mersûme Sagome Nasrâniye’ye red ve ferâga mersûm Serope zimmîye tenbîh olunduğu huzûr-ı âlîlerine i‘lâm olundu. Fî 28 min Zilka‘de sene 1202.