İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 217 Hüküm no: 233 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişastacı esnâfından bazılarının kethüdaları Osman’ın azl edilmesi için açtıkları davada Osman’ın kethüda olarak kalmasına ve şikayetçilerin uyarılmasına karar verildiği Ma‘rûz Nişastacı esnâfından arzuhâl eden Ahmed ve es-Seyyid Süleyman ve Abdullah ve Mehmed ve Emrullah ve İsmail ve Hüseyin ve Manyas ve Mardiros nâm kimesneler meclis-i şer‘-i hatîr-i lâzımü’t-tevkîrde hâlâ kethüdâları Osman mahzarında kethüdâmız merkûm Osman’dan bizler hoşnûd râzı olmayıp âharın kethüdâ olması matlûbumuz olmağla mersûm azl ve yerine âhar kethüdâ nasb olunmak murâdımızdır deyü da‘vâ edip ve esnâf-ı mezbûreden Mahmud Usta ve Usta İsayi ve Usta Repayil ve Usta Kirkor ve Usta Kerope ve Usta Mığır ve Usta Tapal nâm kimesneler dahî kethüdâmız merkûm Osman’dan bizler hoşnûd ve râzı ve şâkî olup umûrumuzu idârede aslâ tehâvün ve tekâsül etmeyip her hâlde cümlemizin hâtırına mürâ‘at birle tesviye şürût ve nizâmımıza sâ‘î olup lâkin şâkî-i merkûmların refîki Molla Hasan nâm kimesne kendi hâlinde olmayıp tama‘kâr ve şürût-ı nizâmımıza muhâlif harekâtından cümlemiz dil-gîr [63a] ve mütezarrır olduğumuzu kethüdâ-yı merkûm bundan akdemce huzûr-ı şer‘îde merkûm Molla Hasan muvâcehesinde i‘lân ve beyân ve merkûmun şerr u mazarratından esnâf fukarâsını tahlîs zımnında istid‘âsıyla ihrâcı içün i‘lâm olmağın merkûmların teşekkîleri mezbûr Hasan’ı derûnumuza idhâl ve cümlemizi perîşân etmekden nâşîdir deyip fi’l-vâki‘ hâl minvâl-i muharrer üzere olup ve kethüdâ-yı merkûm emîn ve müstakim ve min külli’l-vücûh kethüdâlık umûrunu görmeğe kâdir olduğu kilâr kethüdâsı Osman Efendi ve ser nişastacı-ı hazret-i şehriyârî Hüseyin Ağa ve Kilârî es-Seyyid Yahya Ağa ve el-Hâc İbrahim Ağa ve Hüseyin Ağa ve habbâzân kethüdâsı ve nizâm ustaları alâ tarîkı’ş-şehâde meclis-i şer‘de şâkî-i merkûmlar muvâcehelerinde haber vermeleriyle mûcibince merkûm Osman kethüdâlıkda ibkâ olunup ba‘de’l-yevm merkûma hilâf-ı şürût ve nizâm ve muğâyir-i şer‘-i şerîf ta‘arruz etmemek üzre şâkî-i merkûmlara tenbîh olunduğu huzûr-ı âlîlerine i‘lâm olundu. Fî 6 min Zilhicce sene 1202.