İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 220 Hüküm no: 235 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa Vakfı’na ait muattal ekmek fırınının, mütevelli Abdurrahman Bey tarafından kiraya verilmesine izin verildiği Ma‘rûz Nezâret-i aliyyelerinde âsûde evkâfdan sadr-ı esbak merhûm Mehmed Paşa Vakfı’nın mütevellîsi arzuhâl eden İbrahim Hânzâde Abdurrahman Bey tarafından husûs-ı âtîde vekîl olduğu Mehmed Emin b. Mahmud ve Ömer b. Mehmed şehâdetleriyle mütehakkık olan el-Hâc Mehmed Emin b. el-Hâc İsmail sâdır olan emr-i âlîlerine imtisâlen evkâf müfettişi müderrisîn-i kirâmdan Hâfız İbrahim Efendi dâ‘îleriyle bi‘l-ma‘iyye dâ‘îhânede ma‘kûd meclis-i şer‘-i şerîf-i enverde vakf-ı mezkûr musakkafâtından olup İstanbul’da Kadırga Limânı kurbünde vâki‘ beyne’l-cîrân ma‘lûm bir bâb habbâz fırınının beher şehr yirmişer guruş icâre-i mü’eccele-i vâhide ile müşâhereten müste’cirleri üç seneden berû zikr olunan icâresini cânib-i vakfa edâ etmediklerinden mâ‘adâ fırın-ı mezkûru terk ve diyâr-ı âhara firâr ve gayb ve kimesneye dahî ısmarlamadıklarından fırın-ı mezkûr mu‘attal ve cânib-i vakfa muzır olmağın nef‘an li’l-vakf işbu yedimde olan fetvâ-yı şerîfe mûcibince müvekkilim mütevellî-i mûmâileyh fırın-ı mezkûru âhara îcâr murâd etmeğin derûnunda gâ’ibûn-ı mezbûrûnun eşyâları var ise kıbel-i şer‘den kayyım nasb olunup ma‘rifet-i şer‘le yedine teslîm ve hıfz olunmak matlûbudur deyü bi’l-vekâle eylediği bi’l-cümle takrîri vâkı‘a mutâbık olduğu bi’l-ihbâr mütehakkık olup ve fırın-ı mezkûr derûnunda gâ’ibûn-ı merkûmûn ism-i mâl ıtlâk olunur aslâ nesneleri olmadığı bi’l-iltimâs kıbel-i şer‘den mürsel İkinci Kâtib Mevlânâ Merhabâzâde Mahmud Efendi ve ma‘an meb‘ûs ümenâ-i şer‘in inhâlarıyla zâhir olmağın ber-mûceb-i fetvâ-yı şerîfe fırın-ı mezkûru âhara îcâra mütevellî-i mûmâileyh Abdurrahman Bey’e izin verildiği huzûr-ı âlîlerine i‘lâm olundu. Fî 6 min Zilhicce sene 1202.