İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 220 Hüküm no: 236 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan’ın nişastacılık mesleğinden çıkarılması sebebiyle dükkanını işletmesi ve mesleğini devam ettirmesi için Molla Mehmed’i nişastacı olarak vekil tayin ettiği Ma‘rûz Nişastacı esnâfından Molla Hasan b. Süleyman nâm kimesne meclis-i şer‘-i şerîf-i hatîr-i lâzımü’t-tevkîrde kethüdâları Molla Osman ile mazbûtü’l-esâmî ustaları hâzır oldukları hâlde akrabâsından Molla Mehmed b. Ömer mahzarında takrîr-i kelâm edip ben kethüdâ ve esnâfım ile hüsn-ı mu‘âşeret edemediğime binâ’en bundan akdemce ben derûnlarından ihrâc ve mekseb-i âhara şürû‘ etmek üzre i‘lâm olunmuşidi binâ’en alâ zâlik ben hâlâ yedimde mâlım ve mülküm olup İstanbul’da Silivrikapısı kurbünde Veled Karabaş mahallesinde vâki‘ nişastacı kârhânemi ve derûnunda mevcûde bi’l-cümle âlât-ı lâzıme ve eşyâ-i sâ’iremi mezbûr Molla Mehmed’e teslîm ve umûr-ı kârhâne-i mezkûreyi idâre ve rü’yete merkûmu tarafımdan vekîl ve nâ’ib-i menâb nasb edip esnâf-ı mezbûre derûnundan hurûc ve mekseb-i âhara şürû‘ ile fîmâ ba‘d umûrlarına müdâhale etmemeğe ta‘ahhüd eylediğimde mezbûr Molla Mehmed dahî vekâlet-i mezbûreyi kabûl ve esnâf-ı mezbûr dahî râzılar oldu deyü eylediği bi’l-cümle takrîrini merkûm Molla Mehmed ve hâzırûn-ı merkûmûn tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî 14 min Zilhicce sene 1202.