İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 221 Hüküm no: 237 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Kigork’un değirmen işletmeciliğinde işlediği suçlardan dolayı hapsedildiği ancak pişman olduğu ve bu suçları tekrar işlemeyeceğini diğer esnaf huzurunda taahhüd ettiği Ma‘rûz Mahrûse-i Galata’da vâki‘ Yeşildirekli dimekle ma‘rûf üç horoslu bir bâb uncu değirmeninin müste’ciri İstefan v. Kigork nâm zimmî meclis-i şer‘-i şerîf-i enverde Habbâzân Kethüdâsı İsmail Ağa ve Uncular Kethüdâsı İbrahim Ağa ve nizâm ustalarından Ahmed Ağa ve Kadir Ağa ve Yiğitbaşısı Molla Mehmed ve Abdullah Beşe ve Mehmed Beşe ve Ebubekir Beşe ve Usta Aleksan ve Usta Vartan ve Usta Filipos vesâ’ir mazbûtü’l-esâmî ustalar hâzır oldukları hâlde takrîr-i kelâm edip kethüdâ ve ustalar bundan akdemce benim içün sen değirmeninde tahn içün fiy’at-ı maktû‘undan ziyâde semen ile hınta iştirâ edip nizâmımızın ihtilâline bâ‘is ve hilâf-ı emr hareket edersin deyü benden iştikâ birle vaz‘-ı zindân olmuşidim elhâletü hâzihî ben cemî‘ cerâyim-i güzeşteme istiğfâr edip fîmâ ba‘d hilâf-ı emr-i âlî ve muğâyir-i şürût u nizâm hareket etmemeğe ta‘ahhüd edip eğer hilâf-ı mu‘âhede hareketim zâhir olur ise sefâyin-i sultâniyede vaz‘-ı kürek ile mücâzâta râzı olduğumdan mâ‘adâ eylediğim ahde vefâ edeceğime işbu meclisde hâzır Aleksan v. Karabet ve Avanes v. Hacador nâm zimmîler dahî tekeffül ederler deyü eylediği cemî‘ takrîr-i meşrûhunu mersûmân ve hâzırûn-ı merkûmûn tasdîk eyledikleri huzûr-ı âlîlerine İstanbul Mahkemesi’nden i‘lâm olundu. Fî 13 min Zilhicce sene 1202.