İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 222 Hüküm no: 238 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Süleyman Ağa’nın, Tanaş v. Vasil’den alacaklı olduğu ancak ziyade talep sebebiyle Tanaş’a zulm etmemesinin emredildiği Ma‘rûz Derûn-ı arzuhâlde mezkûr el-Hâc Süleyman Ağa b. Veliyyüddin sâdır olan emr-i âlîlerine imtisâlen Çarşamba günü Dîvân-ı âlî’de ba‘dehû dâ‘îhânemizde ma‘kûd meclis-i şer‘-i şerîf-i enverde arzuhâl eden Tanaş v. Vasil nâm zimmî ile terâfu‘larında mersûm Tanaş zimmîye ber-vech-i poliçe edâ eylediğim iki bin guruş için benden bilâ devrin murâbaha nâmıyla ahz eylediği iki yüz altmış altı guruş ile emânet olmak üzere malımdan bin iki yüz bir senesi odasında kendiye verdiğim beş yüz guruşdan yüz guruşunu bana teslîm bâkî altı yüz altmış altı guruşu zimmetinde kalmağla taleb ederim deyü da‘vâ ol dahi müdde‘î-i mezbûrun kabzını mu‘terif olduğu yüz guruş ile emânet verdiği beş yüz guruş hakkında tasdîk lâkin bilâ devrin murâbaha nâmıyla ancak altmış altı guruş kabzını ikrâr mâ‘adâ iki yüz guruş kabzını inkâr eylediğinden mâ‘adâ emânet olan beş yüz guruşu dahî emriyle işbu meclisde hâzır Peşoğlu nâm sarrâfa teslîm etmemle kendiye medfû‘um olan yüz guruşun altmış altı guruşu rıbh olmak üzre makbûzum olan altmış altı guruşa takâs ve mahsûb olunup bâkî zimmetinde otuz dört guruş hakkım kalmışdır deyü da‘vâ ol dahî emrini inkâr edip mersûm Tanaş zimmî emr-i da‘vâsını ve merkûm el-Hâc Süleyman dahî ziyâde iki yüz guruşu teslîmini beyândan izhâr-ı acz ve her biri bi’t-taleb tahlîf olunmalarıyla mûcibince zikr olunan beş yüz guruşdan merkûm el-Hâc Süleyman Ağa’nın i‘tirâf eylediği yüz guruşdan zimmetinde bâkî kalan otuz dört guruşu ba‘de’t-takâs bâkî dört yüz altmış altı guruşu müdde‘î-i mezbûra edâ ve teslîme mersûm Tanaş zimmîye tenbîh olunup ziyâde iki yüz guruşu da‘vâsıyla merkûm el-Hâc Süleyman mersûm Tanaş zimmîye bilâ beyyine mu‘ârazadan men‘ olunduğu huzûr-ı âlîlerine i‘lâm olundu. Fî 16 min Zilhicce sene 1202.