İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 222 Hüküm no: 239 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Süleyman Ağa’nın, Tanaş v. Vasil’den alacaklı olduğu ancak ziyade talep sebebiyle Tanaş’a zulm etmemesinin emredildiği Ma‘rûz Arzuhâl eden el-Hâc Süleyman Ağa b. Veliyyüddin meclis-i şer‘-i şerîf-i enverde arzuhâlde mezkûr Tanaş v. Vasil nâm zimmî ile terâfu‘larında mersûm Tanaş zimmîye ber-vech-i poliçe edâ eylediğim iki bin guruş içün benden bilâ devrin murâbaha nâmıyla ahz eylediği iki yüz altmış altı guruş ile emânet olmak üzere mâlımdan bin iki yüz bir senesi odasında kendiye verdiğim beş yüz guruşdan yüz guruşunu bana teslîm bâkî altı yüz altmış altı guruşu zimmetinde kalmağla taleb ederim deyü da‘vâ ol dahî müdde‘î-i mezbûrun [65a] kabzını mu‘terif olduğunu yüz guruş ile emânet verdiği beş yüz guruş hakkında tasdîk lâkin bilâ devrin murâbaha nâmıyla ancak altmış altı guruş kabzını ikrâr mâ‘adâ iki yüz guruş kabzını inkâr eylediğinden mâ‘adâ emânet olan beş yüz guruş dahî emriyle işbu meclisde hâzır Mişoğlu nâm sarrâfa teslîm etmemle kendiye medfû‘um olan yüz guruşun altmışaltı guruş rıbh olmak üzere makbûzum olan altmış altı guruşa takâs ve mahsûb olunup bâkî zimmetinde otuz dört guruş hakkım kalmışdır deyü da‘vâ ol dahî emrini inkâr edip mersûm Tanaş zimmî emr-i da‘vâsını merkûm el-Hâc Süleyman dahî ziyâde iki yüz guruşu teslîmini beyândan izhâr-ı acz ve her biri bi’t-taleb tahlîf olunmalarıyla mûcibince zikr olunan beş yüz guruşdan merkûm el-Hâc Süleyman Ağa’nın i‘tirâf eylediği yüz guruşdan zimmetinde bâkî kalan otuz dört guruş ba‘de’t-takâs bâkî dört yüz altmış altı guruşu müdde‘î-i mezbûra edâ ve teslîm mersûm Tanaş zimmîye tenbîh olunup ziyâde iki yüz guruş da‘vâsıyla merkûm el-Hâc Süleyman mersûm Tanaş zimmîye bilâ tenbîh mu‘ârazadan men‘ olunduğu huzûr-ı âlîlerine i‘lâm olundu. Fî 16 min Zilhicce sene 1202.