İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 223 Hüküm no: 240 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Yovan v. Anaştaş’ın Ali Ağa’dan alacaklı olduğu Ma‘rûz Arzuhâl eden Sarrâf Yovan v. Anaştaş nâm zimmî meclis-i şer‘-i şerîf-i enverde boğasıcı esnâfından Ali Ağa b. Osman ile terâfu‘larında işbu yedimde olan bin iki yüz iki senesi Şa‘bân-ı Şerîf’in üçüncü günü târihiyle müverrah ve mezbûr Ali Ağa’nın hatmiyle mahtûme bir kıt‘a temessük nâtık olduğu üzre mezbûr Ali Ağa’ya mâlımdan beş yüz guruş ikrâz ve teslîm ol dahî iktirâz ve kabz ve zimmetinde bana deyni ol dahî beyân ve işhâd edip işbu temessük tahrîr ve temhîr ve yedime i‘tâ etmişidi hâlâ meblağ-ı mezkûru bana edâ etmeyip zimmetinde olmağla taleb ederim deyü ba‘de’d-da‘vâ ve’l-ikrâr alâ mûcib-i ikrârihî meblağ-ı mezkûr beş yüz guruş edâya ba‘de’t-tenbîh mezbûr Ali Ağa deyni olan meblağ-ı mezkûr beş yüz guruşu hâlen edâya iktidârım yokdur deyü târîh-i i‘lâmdan otuz bir gün tamâmında edâya ta‘ahhüd eyledikde mersûm Yovan zimmî dahî râzı olduğu İstanbul Mahkemesi’nden huzûr-ı âlîlerine i‘lâm olundu. Fî 16 min Zilhicce sene 1202.