İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 223 Hüküm no: 241 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Halil’in toz şeker bahasından el-Hâc Yusuf Ağa’ya borçlu olduğu Ma‘rûz Mısır Çarşısı tüccârından el-Hâc Yusuf Ağa b. Abdurrahman meclis-i şer‘-i şerîf-i enverde akîdeci esnâfından İsmail Ağa b. Halil ile terâfu‘larında merkûm İsmail Ağa bundan akdem Fatih Sultan Mehmed Hân Câmi‘-i Şerîfi kurbünde Küçük Karaman’da Akîdeci Cezâyirli nâm kimesnenin şerîki olduğu müddet-i ma‘lûmede vezn ve kıymeti beynimizde ma‘lûm yedimden ve mâlımdan müşterâ ve makbûz şeker-i gubâr semeninden işbu yedimde olan bir kıt‘a temessük mantûkunca ba‘de külli’l-hesâb zimmetinde bin dört yüz altmış iki guruş hakkım olup meblağ-ı mezkûr cihet-i merkûmeden zimmetinde bana edâsı vâcib deyni olduğunu mezbûr İsmail Ağa huzûr-ı Müslimînde tav‘an ikrâr ve beyân ve işhâd eyledikden sonra meblağ-ı mezkûrdan otuz beş guruş bir def‘a ve doksan bir buçuk guruş bir def‘a ve altmış guruş bir def‘a ki cem‘an üç def‘a da yüz seksen altı buçuk guruşunu teslîm edip bâkî bin iki yüz yetmiş beş buçuk guruşu hâlâ zimmetinde olmağla taleb ederim deyü ba‘de’d-da‘vâ ve’l-ikrâr alâ mûcib-i ikrârihî meblağ-ı bâkî-i mezkûr bin iki yüz yetmiş beş buçuk guruş müdde‘î-i mezbûra edâ ve teslîme ba‘de’t-tenbîh mezbûr İsmail Ağa deyni olan meblağ-ı bâkî-i mezkûru def‘aten edâya iktidârı olmayıp [65b] ve hâlâ şerîki Sarıgezli Hüseyin Ağa dahî diyâr-ı âharda olup dört aya değin çeki? musammem olmağla işbu Zilhiccetü’ş-şerîfe gâyetinde elli guruş ve Muharremü’l-harâm ve Saferü’l-hayr ve Rebî‘ü’l-evvel gâyetlerinde dahî ellişer guruşdan dört ayda iki yüz guruşunu müneccemen ve bâkî bin yetmiş beş buçuk guruşunu tamâmen edâya ta‘ahhüd eyledikde mezbûr el-Hâc Yusuf Ağa dahî râzı olduğu İstanbul Mahkemesi’nden huzûr-ı âlîlerine i‘lâm olundu. Fî 17 min Zilhicceti’ş-şerîfe sene 1202.