İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 224 Hüküm no: 242 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafının nizamlarının hilafına hareket edenlerinin cezalandırılmasının talep edildiği Ma‘rûz Habbâzân Kethüdâsı İsmail Ağa ve Yiğitbaşı Molla Mehmed ve Salcı Molla Ahmed ve nizâm ustalarından Ahmed Ağa ve Kadri Ağa ve Ebubekir Beşe ve Abdullah Beşe ve Filipos ve Aleksan ve Tokel ve Vartan vesâ’ir mazbûtü’l-esâmî ustalar meclis-i şer‘-i şerîf-i enverde francalacı ustalarından Bahçekapısı’nda Yorgi, Sarıgez’de Dimitri, Tekfur Sarayı’nda Pendeli, Yenikapı’da Nikola, Taşlıburun’da Yani, Galata’da Andon, Karanlık Çarşı’da Dimitri ve Andon ve Kasımpaşa’da Mihal ve Üsküdar’da Dimitri ve Beylerbeyi’nde Yorgi ve Emirgünoğlu’nda Yorgi ve Arnavud karyesinde Dimitri nâm zimmîler hâzırlar oldukları hâlde takrîr-i kelâm edip Galata’da bir aded Beyoğlu’nda üç aded ki cem‘an dört aded francala fırını efrenç tâ’ifesinden mahsûr olup nizâmımıza gayr-ı dâhil olmağla ancak nizâmımıza dâhil olan istanbul’da dört aded Galata’da dört aded Kasımpaşa’da iki aded Taşlıburun’da bir aded Üsküdar’da bir aded Beylerbeyi’nde bir aded Emirgünoğlu’nda bir aded Arnavudköyü’nde bir aded ki cem‘an on beş aded fırın-ı mahsûs ve zikr olunan fırınlar tabh eyledikleri francala ekmeklerini destgâhlarında bey‘ eylediklerinden mâ‘adâ iki fırından Saray-ı cedîd ve Sarıgez’den, Saray-ı atîk ve Bahçekapısı’ndan Saray-ı sadr-ı a‘zâmî ve Tekfûr Sarayı’ndan Ağakapısı kurbünde vâki‘ dört aded bakkâl dükkânına francala vaz‘ olunup Âsitâne ve Kasımpaşa fırınlarına ta‘yîn ve tahsîs olunan yirmişer nefer ve fırın-ı sâ’irelere ta‘yîn olunan on nefer küfecileri dahî kendi hudûd ve sınırlarında esvâk ve pazârda francala etmeklerini bey‘ edib bakkâl ve manav ve südcü, kebâbcı dükkânlarına ve mahâll-i sâ’ireye francala bırakmayıp ve sınırlarını tecâvüz etmemek bâ-emr-i âlî şürût ve nizâmımızdan iken zikr olunan fırınlar hilâf-ı emr-i âlî ve muğâyir-i şürût-ı nizâm küfecilerin adedleri ma‘lûm olmayıp ve sınırlarını tecâvüz ve diledikleri mahallere francala bırakıp ol vecihle ta‘yîn olunan dakîkleri kifâyet etmemeğin habbâzân tâ’ifesini itma‘ ve hufyeten dakîklerinin hâssını iştirâ etmeleriyle nân-ı azîzin esmer olmasına bâ‘is olduğuna binâ’en men‘ olmalarını murâd eylediğimizde mersûmûn ber-mûceb-i emr-i âlî [66a] şürût u nizâmımızı i‘tirâf edip ba‘de’l-yevm bilâd-ı erba‘ada vâki‘ fırınlara ta‘yîn olunan küfecilere kıbel-i şer‘den memhûr tezkireler verilip tezkiresiz küfeci bulunmaya, dört mahalden gayrı bakkâl ve manav ve südcü ve helvacı ve kebâbcı ve hoşâbcı vesâ’ir mahallere francala bırakılmaya ve zikr olunan fırınlarda okka ekmeği tabh olunmaya ve francala beyaz ve hâs ve tâmü’l-vezn ve pişkîn olup hilâf-ı emr-i âlî ve muğâyir-i şürût-ı nizâm hareketleri zâhir olur ise bilâ tevakkuf ahz olunup bu def‘a sâdır olan emr-i âlî mûcibince cezâları tertîb oluna deyü her biri bizimle mukâvele ve mu‘âhede ve ber-vech-i muharrer amel olunmak üzere birbirlerine kefîl oldu deyü eyledikleri bi’l-cümle takrîr-i meşrûhlarını hâzırûn-ı mersûmûn tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî 18 min Zilhicceti’ş-şerîfe sene 1202.