İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 225 Hüküm no: 243 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun b. Abdullah’ın helvacı dükkanını başka bir mahalle taşıma isteğinin kanuna muhalif olduğu Ma‘rûz Derûn-ı arzuhâlde mezkûretü’l-ism Ümmügülsüm Hatun bt. Abdullah tarafından husûs-ı âtîde vekil olduğu zâtını ârifân es-Seyyid Osman b. Hasan ve İbrahim b. Hasan nâm kimesneler şehâdetleriyle sâbit olan el-Hâc Mehmed Salih b. Mahmud meclis-i şer‘-i şerîf-i enverde Helvacıyân Kethüdâsı Vekîli Mehmed Emin Usta ve es-Seyyid Mehmed Usta ve el-Hâc İbrahim Usta ve Mustafa Usta ve Hüseyin Usta ve Ahmed Usta ve Mehmed Usta ve diğer Hasan Usta ve diğer Mehmed Usta ve Süleyman Usta ve diğer Mustafa Usta ve Osman Usta ve Hüseyin Usta ve Mehmed Usta nâm kimesneler hâzır oldukları hâlde bi’l-vekâle takrîr-i kelâm edip müvekkilem mezbûre mahmiyye-i İstanbul’da Koca Mustafapaşa Câmi‘-i Şerifi kapısı karşında iki tarafdan kahveci dükkânı ve bir tarafdan değirmen ve taraf-ı râbi‘i tarîk-i âm ile mahdûd bir bâb helvacı dükkânı derûnunda mevcûd ve yedinde mülkü olup beyne’l-hıref gedik ta‘bîr olunur âlât-ı lâzımeyi câmi‘-i şerîf-i mezkûr tahtında vâki‘ bir bâb dükkâna nakl edip lâkin hâmiş-i arzuhâlde muharrer başmuhâsebeden muhrec derkenâr nâtık olduğu üzre bilâd-ı erba‘ada vâki‘ gedikli helvacı dükkânı doksan sekiz adedden ziyâde ve noksân olmayıp ve hîn-i tahrîrde bulundukları mahalden âhar mahalle nakl olunmamak üzre her bir dükkân ism ve resmi ve mahalli ile başmuhâsebede mukayyed ve dükkân sâhibleri kirâ artırmak dâ‘iyyesiyle aslen ve kat‘an gedik ashâbı olan müste‘cîrlerine müdâhale ve dükkândan çık deyü mu‘âraza ve münâkaşa etmeyeler deyü emr-i âlî sudûr etmeğin nizâm-ı mezkûr ilâ hâze’l-ân beynimizde cârî düstûrü’l-amel olduğu [66b] ma‘lûm ve meczûmu oldukda müvekkilem mezbûre âlât-ı lâzıme-i mezkûreyi mahall-i âhara nakli hilâf-ı emr-i âlî ve muğâyir-i şürût ve nizâm olduğuna binâ’en âlât-ı mezkûreyi câmi‘-i şerif-i mezkûr tahtında olan dükkândan ihrâc ve kemâ fi’s-sâbık mekân-ı evveli olan kahve ve fırın ve tarîk-i âm ile mahdûd olan dükkâna nakl ve vaz‘ ve min ba‘d hilâf-ı emr-i âlî hareket etmemeğe ta‘ahhüd eyledi deyü eylediği bi’l-cümle takrîrini hâzırûn-ı merkûmûn ba‘de’t-tasdîk işbu i‘lâm-ı mezkûr ve ahd-i merkûm dahî başmuhâsebeye kayd ve emr-i evveli mü’eyyed ve mü’ekked yedlerine bir kıt‘a tuğrâlı emr-i âlî dahî istid‘â eyledikleri huzûr-ı âlîlerine i‘lâm olundu. Fî 18 min Zilhicceti’ş-şerîfe sene 1202.