İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 227 Hüküm no: 246 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ahmed Efendi’nin, vefat eden Ömer Efendi’den alacaklı olduğunu ancak alacaklarını tahsil ettikten sonra bile ortakları Mihayil ve Avanes’ten tekrar alacak talebiyle eylediği davanın reddolunduğu Ma‘rûz Bâ-işâret-i aliyye sâdır olan fermân-ı âlîlerine imtisâlen sâhib-i arzuhâl es-Seyyid Ahmed Efendi b. el-Hâc Abdullah nâm kimesne meclis-i şer‘-i enverde sarrâf tâ’ifesinden derûn-ı arzuhâlde isimleri mastûr Mihayil v. Ariton nâm zimmînin inânen şerîki ve tarafından vekîl-i şer‘îsi Avanes v. Mercan nâm zimmî muvâcehesinde mersûm Avanes zimmî ile şerîki merkûm Mihayil zimmi bin yüz doksan yedi senesi düyûnu terekesinden ezyed olduğu hâlde medîne-i Haleb’de fevt olan Ömer Efendi zimmetinde iki kıt‘a temessük ve mantûkunca cihet-i karzdan dört bin guruş ve bi-şarti’r-rücû‘ emriyle masrûfları olan iki yüz elli guruş ki cem‘an dört bin iki yüz elli guruş alacak hakkımız olup hayâtında [67a] ikrâr dahî etmişidi deyü terekesinden da‘vâ ve ba‘de’l-isbât ve’l-hükm vasî-i mansûbu İbrahim Cenâb Efendi yedinden ahz eylediklerinden sonra ben dahî müteveffâ-yı mezbûr zimmetinde cihet-i deyn-i şer‘îden üç bin guruş hakkım olduğunu ba‘de’l-isbât ve’l-hükm meblağ-ı mezkûr üç bin guruşun bin altı yüz on sekiz guruşunu alâ tarîki’l-garâme mersûmândan ahz etmişidim lâkin zimmîyân-ı mersûmânın tereke-i müteveffâ-yı mezbûrdan almak üzere isbât eyledikleri dört bin iki yüz elli guruşun iki bin iki yüz elli guruşu deyn-i sahîh olup mâ‘adâ Haleb’e gider olduğu hâlde güzeşte murâbaha olmak üzre iki bin guruşu bilâ devr-i mahz-ı ribâ olmağla makbûzları olan meblağ-ı ma‘lûme benim sâbit ve mahkûmun bih hakkım olan üç bin guruş ile anların sahîhan alacakları olan iki bin iki yüz elli guruş beyninde garâmeten tahsîl olunup hisseme ziyâde lâzım gelen meblağ bana edâya mersûmâna tenbîh olunmak matlûbumdur deyü da‘vâ eyledikde mersûm Avanes zimmî dahî müteveffâ-yı mezbûra bin yüz doksan yedi senesi Saferü’l-hayrı gurresinde Suluhân’da kâ’in odalarında beyaz akçe olmak üzere müdde‘î-i mezbûrun mukır ve mu‘terif olduğu iki bin guruşdan mâ‘adâ üç ay mürûrundan sonra Haleb’e gider olduğu hâlde bir def‘a dahî iki bin esedî guruş huzûr-ı Müslîminde nakden ad ve teslîm ve müteveffâ-yı mezbûr dahî bi-aynihî kabz etmekle târîheyn-i merkûmeynde bi-aynihî nakden ahz ü kabz eylediği dört bin guruş ile emriyle masrûfumuz olan iki yüz elli guruş ki cem‘an dört bin iki yüz elli guruş zimmetinde deyni olduğunu beyân ve işhâd etmişdir dedikde mezbûr es-Seyyid Ahmed Efendi müteveffâ-yı mezbûrun dört bin guruş kabzını inkâr etmekle mersûm Avanes zimmî şerîki merkûm ile meblağayn-i merkûmeyn dört bin guruşu müteveffâ-yı mezbûre hîn-i teslimlerinde mevcûd bulunup şâhid olmak üzere ikâmet eyledik Ömer Ağa b. Mehmed ve Mehmed Ağa b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakîka müteveffâ-yı mezbûr Ömer Efendi bin yüz doksan yedi senesi Saferü’l-hayrı gurresinden sarrâfân-ı merkûmândan Suluhân’da kâ’in odalarında bir def‘a iki bin guruş ve üç ay mürûrundan sonra medîne-i Haleb’e gider olduğu hâlde dahî iki bin guruş ki cem‘an dört bin guruş bizim huzûrumuzda bi’l-mu‘âyene nakden ahz ü kabz edip zimmetinde deyni olduğuna bizi işhâd eyledi biz bu husûsa mu‘âyene ettiğimiz vech üzre şâhidleriz şehâdet dahî ederiz deyü her biri edâ-yı şehâdet-i şer‘iyye ettiklerinde da‘vâ-yı mezkûresiyle mersûmân Avanes ve Mihayil zimmîlere bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 14 min Zilhicce sene 1202.