İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 228 Hüküm no: 247 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Osman’ın kahve dükkanının gedik hisse ve aletlerini el-Hâc Halil Ağa’ya sattığı Ma‘rûz Derûn-ı arzuhâlde mezkûr İbrahim Efendi b. Osman sâdır olan emr-i âlîlerine imtisâlen müfettiş-i hazret-i sadr-ı a‘zamî müderrisîn-i kirâmdan İbrahim Efendi dâ‘îleriyle bi’l-ma‘iyye dâ‘îhânede ma‘kûd meclis-i şer‘-i hatîrde Sultân Süleyman Hân -aleyhi’r-rahmetü ve’l-gufrân- hazretlerinin câmi‘-i şerîfleri vakfı musakkafâtından Tiryâki Çarşısı dimekle ma‘rûf mahalde kâ’in beyne’l-cîrân ma‘lûmü’l-hudûd bir bâb kahve dükkânına vâzı‘u’l-yed olan vakf-ı mezkûr mütevellîsi el-Hâc Halil Ağa [67b] b. Abdurrahman tarafından vekîli Seyfullah Ağa b. Abdullah mahzarında işbu yedimde olan hüccet-i şer‘iyye nâtıka olduğu üzere zikr olunan kahve dükkânı derûnunda mevcûd olup gedik olmak üzere mâlik olduğum beş kahve ibriği bir mangal beş duhân çubuğu on fincan beş yasdık ve âlât-ı sâ’ire-i lâzımemi iki yüz altmış guruşa tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mütevellî-i mûmâileyhe bey‘ ve temlîk ol dahî vakf-ı şerîf-i mezkûr içün bi’t-tevliye iştirâ ve temellük ve kabûl ve semen-i mezkûr iki yüz altmış guruşu mâl-ı vakf-ı mezbûrdan bana edâ etmeğin ba‘de’l-yevm âlât-ı mezkûrede benim alâkam kalmayıp müstagillât-ı vakf-ı müşârunileyhden olmuşdur deyü eylediği takrîr-i meşrûhunu vekîl-i mezbûr tasdîk eylediği huzûr-ı âlîlerine i‘lâm olundu. Fî 20 min Zilhicce sene 1202.