İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 229 Hüküm no: 248 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da hilâf-ı kânûn gizlice Mısır süpürgesi satanların engellenmesi Mısır süpürgeci esnâfının kethüdâsı el-Hâc İbrahim ve ustalarından Yiğitbaşısı Salih ve Molla Mehmed ve Abdülfettah ve Küçük Ali ve Mehmed Usta ve Ahmed ve Ömer ve el-Hâc İsmail ve Murad ve Yiğitbaşı ve diğer Ahmed ve Ali Odabaşı ve Hasan ve diğer Mehmed ve Kalyoncu Mehmed vesâ’ir mazbûtü’l-esâmî ustalar meclis-i şer‘-i şerîf-i enverde Ağakapısı’ndan Kollukçu Musa mübâşeretiyle ihzâr olunan Bakkâl Sava v. İstirati nâm zimmî ile terâfu‘larında Rüstem Paşa Câmi-i Şerîfi kurbünde Attâr Gürcü Sarı Mehmed hâzır olduğu hâlde her biri takrîr-i kelâm edip işbu yedimizde olan emr-i âlî nâtık olduğu üzre mahrûse-i Edirne’de hâsıl olan Mısır süpürgesi ancak Âsitâne-i aliyye’ye gelip bin aded süpürge seksen guruşa olmak üzere esnâfa tevzî‘ anlar dahî beher adedi beş paraya ibâdullâha bey‘ etmek üzere tanzîm olunmuşken mersûm Sava zimmî Edirneli olmak takrîbi şerîkler peydâ ve mahallinde süpürgeyi ahz ve Âsitâne’ye tesbîl ve ziyâde fâhiş ile esnâfa bey‘ eylediğinden mâ‘adâ hâlâ getirdiği süpürgeden bin adedini merkûm Gürcü Sarı Mehmed’e teslîm ol dahî ihtifâ edip ve merkûm Sarı Mehmed’in dahî dâ’imâ gelen süpürgeyi tüccârdan hufyeten ahz ve diyâr-ı âhara irsâl mu‘tâdı olmağın ber-mûceb-i emr-i âlî ihtifâ eyledikleri bin aded süpürgeyi semen-i ma‘lûmesiyle bize teslîm ve min ba‘d süpürge husûsunda müdâhale etmemelerine tenbîh olunmak murâdımızdır deyü eyledikleri bi’l-cümle takrîrlerini merkûmân tasdîk ve ihtifâ eyledikleri bin aded süpürgeyi esnâf-ı mezbûra ba‘de’t-teslîm fîmâ ba‘d merkûmân süpürge umûruna müdâhale etmeyip eğer müdâhale ve ta‘arruzları vâki‘ olur ise te’dîb olunmakları kendilere tefhîm olundukda anlar dahî ba‘de’l-yevm süpürge bey‘ ve şirâsına karışmamağa ta‘ahhüd eyledikleri İstanbul Mahkemesi’nden huzûr-ı âlîlerine i‘lâm olundu. Fî 20 min Zilhicce sene 1202.