İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 230 Hüküm no: 249 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi fırınlarında francala ekmeğinin pişirilmesi ve küfeciler tarafından satılmasının yasak olduğu Ma‘rûz Âsitâne-i aliyye ve bilâd-ı selâsede vâki‘ francalacı ustalarından Pandeli ve Yorgi ve Dimitri nâm zimmîler meclis-i şer‘-i şerîf-i enverde Habbâzân Kethüdâsı İsmail Ağa ve Molla Mehmed ve Ebubekir ve Usta Aleksan ve Tokel ve Filipos vesâ’ir mazbûtü’l-esâmî ustalar hâzırlar oldukları hâlde Ağakapısı’ndan Kollukçu Mehmed Sadık mübâşeretiyle ihzâr olunan Yahûd tâ’ifesine mahsûs ve çörekçi esnafına mülhak mahmiyye-i mezbûrede Balatkapısı hâricinde vâki‘ bir bâb Yahûd çörekçisi fırını usta ve neferâtından Horani v. Yakoma ve Mordehay v. Moses nâm Yahûdîler ve yine Balatkapısı dâhilinde vâki‘ fırın ustası İsak v. Hayim nâm Yahûdî ve Mahmudpaşa kurbünde Kazgancılar başında Parmakkapı’ya muttasıl fırın ustası Pako v. Yasef nâm Yahûdî muvâcehelerinde Âsitâne ve bilâd-ı selâsede vâki‘ francala fırını bâ-emr-i âlî on beş adedde maksûd ve mahsûr olup francala ve hâs ekmek zikr olunan on beş aded fırından gayrı bir fırında tabh olunmayıp ve fırın-ı mezkûrlara ta‘yîn olunan küfecilerden gayrı küfeci dahî francala bey‘den memnû‘lar iken işbu mersûmûn fırınlara hilâf-ı emr-i âlî ve muğâyir-i şürût u nizâm hâs ekmek tabh etmeleriyle te’dîb olunmalarını murâd eylediğimizde mersûmûndan her biri hilâf-ı emr-i âlî ve muğâyir-i şürût u nizâm hareketlerini ikrâr lâkin ba‘de’l-yevm fırınlarımızda çörekçilere mahsûs eşyâdan francala ve hâs ekmek işlemeyiz eğer işlediğimiz vâki‘ olur ise bizler mü’ebbeden Tersâne-i âmireye vaz‘-ı kürek olunup fırınlarımızda mevcûd âlât-ı lâzımemiz cânib-i mîrîden ahz olunmağa râzılarız deyü ta‘ahhüd ve birbirlerine tekeffül etmeleriyle mersûmûn dahî râzı oldukları İstanbul Mahkemesi’nden huzûr-ı âlîlerine i‘lâm olundu. Fî 23 min Zilhicce sene 1202.