İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 230 Hüküm no: 250 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’a ait nalband dükkanının gedik hisse ve aletlerinin vekili tarafından Mustafa b. Abdullah’a satıldığı Ma‘rûz Na‘alband esnâfından Mustafa b. Abdullah meclis-i şer‘-i şerîf-i enverde zikri âtî vakfın mütevellîsi ser-tabbâhîn-i hâssa el-Hâc Mehmed Ağa ve Na‘alband Kethüdâsı İsmail Ağa ve mazbûtü’l-esâmî ustalar hâzır oldukları hâlde Hanife Hatun bt. İsmail tarafından vekîli zevci Mehmed Said Efendi b. Mehmed mahzarında tabbâhîn-i hâssa ocağı derûnunda vâki‘ câmi‘-i şerîf ve mekteb vakfı musakkafâtından olup ocağ-ı mezkûr hâricinde vâki‘ bir bâb na‘alband dükkânı ve muttasıl at ahurı derûnunda mevcûd ber-mûceb-i defter-i müfredât gedik ta‘bîr olunur âlât-ı lâzıme-i ma‘lûmeye mütevellî-i vakf temessüküyle müvekkile-i mezbûre mutasarrıfe olmağla zikr olunan dükkân ve ahur ve âlât-ı lâzıme-i mezkûreyi bin iki yüz üç senesi Muharremü’l-harâmı gurresinden vekîl-i mezbûr Mehmed Said Efendi beher şehr on sekizer guruşa bana bi’l-vekâle îcâr ve teslîm ben dahî ber-vech-i muharrer istîcâr ve kabûl edip ve îcâre-i mezkûrenin beher şehr yedi guruşunu zikr olunan dükkân ve ahur ve âlât-ı lâzımenin icâre-i mü’eccelesiçün vakf-ı mezbûr mütevellîsi hâzır-ı mezbûr el-Hâc Mehmed Ağa’ya teslîme bana emr ve beni tevkîl bâkî on bir guruşunu müvekkile-i mezbûreye edâ etmek üzre mu‘âhede eyledikde ben dahî kabûl ve râzı oldum deyü eylediği takrîr-i meşrûhunu mezbûr Mehmed Said Ağa tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 23 min Zilhicce sene 1202.