İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 231 Hüküm no: 251 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Hasan ve karısının, mahalle ahalisine küfür ve hakaretlerinden dolayı Çukur Mahalle’den çıkartılıp başka bir mahallede iskan edilmeleri Ma‘rûz İstanbul’da Sultân Selîm Câmi‘-i Şerîfi kurbünde Çukur Mahalle İmâmı Mehmed Efendi ve Müezzin Molla Halil ve ahâlîsinden Kahveci Seyyid Ali oğlu Mehmed ve Süleyman b. İbrahim ve Mustafa ve Ahmed ve Mehmedali ve Kasım ve Numan ve diğer Mehmed ve diğer Mustafa ve Hasan ve Ahmed ve Ömer ve İbrahim vesâ’ir ma‘lûmü’l-esâmî zikr ve inâsdan cem‘-i kesîr ve cemm-i gafîr meclis-i şer‘-i şerîf-i enverde arzuhâl eden Derviş Hasan b. Hüseyin nâm kimesne muvâcehesinde mezbûr Derviş Hasan küll-i yevm mest-i müdâm ve civârında olan komşularını dâ’imâ tekdîr ve ahâlî-i mahalleye şetm ve cümlemiz kendiden dil-gîr ve cemî‘ menâhî mürtekib ve kendiden emn u râhatımız meslûb olmağın merkûm Derviş Hasan ve zevcesi hâzıra bi’l-meclis menzillerinden hurûc ve mahall-i âhara iskân içün tenbîh olunmak matlûbumuzdur deyü ba‘de’d-da‘vâ mezbûr Derviş Hasan ve zevcesi menzil-i mezkûrdan hurûc ve mahalle-i mezbûre imâmı ve ahâlî ma‘rifetiyle âhara îcâr ile kendileri mahall-i âhara nakl ta‘ahhüd eyledikleri huzûr-ı âlîlerine i‘lâm olundu. Min Zilhicce sene 1202.