İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 231 Hüküm no: 252 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun bt. İsmail’in dükkan kirasından alacağı sebebiyle el-Hâc Mehmed Ağa’ya açtığı davada sulh oldukları Ma‘rûz İstanbul’da Saray-ı Sadr-ı a‘zâmî kurbünde tabbâhîn-i hâssa ocağı dâhilinde vâki‘ câmi‘-i şerîf ve mekteb vakfı musakkafâtından ocak-ı mezkûr hâricinde kâ’in beyne’l-cîrân ma‘lûm bir bâb na‘alband dükkânı derûnunda mevcûd âlât-ı lâzıme-i ma‘lûmeye mütevellî-i vakf temessüküyle mutasarrıfe Hanife Hatun bt. İsmail’in zevci tarafından müseccel vekîli Mehmed Said Ağa b. Mehmed meclis-i şer‘-i şerîf-i enverde vakf-ı mezbûr mütevellîsi ser tabbâhîn-i hâssa el-Hâc Mehmed Ağa hâzır olduğu hâlde dükkân-ı mezkûrun müşâhereten müste’ciri Mustafa b. Abdullah mahzarında bi’l-vekâle takrîr-i kelâm edip mezbûr Mustafa dükkân-ı mezkûrede beher şehr yirmi dört guruş icâre ile müşâhereten müste’ciri olup ecr-i müsemmâ-yı mezkûrun beher şehr yedişer guruşunu müvekkilem mezbûrenin emriyle icâre-i mü’eccelesi içün cânib-i vakfa edâ bâkî on yedi guruşunu müvekkilem mezbûra teslim edip lâkin târîh-i i‘lâma gelince beher şehr on yedişer guruşdan otuz altı ayda altı yüz on iki guruş edâ etmeyip zimmetinde kaldı deyü da‘vâ ol dahî inkâr etmeğin ba‘de vukû‘i’l-münâza‘a bâ-vesâtat-ı muslıhîn da‘vâ-yı mezkûremden beni mezbûr Mustafa ile otuz guruş üzerine sulh eylediklerinde ben dahî bi’l-vekâle sulh-ı mezbûru kabûl ve bedel-i sulh-ı mezkûr otuz guruşu yedinden vekâleten ahz ü kabz edip bin iki yüz üç senesinin Muharremi gurresine gelince dükkân-ı mezkûrenin kirâsına müte‘allika-i âmme da‘vâdan mezbûr Mustafa’nın zimmetini bi’l-vekâle ibrâ ve iskāt eylediğimde ol dahi ibrâ-yı mezkûru kabûl eyledi deyü eylediği bi’l-cümle takrîrini tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 23 min Zilhicce sene 1202.