İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 233 Hüküm no: 254 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ağya v. Toros’un karısı ve çocuklarına intikal eden vakıf arsasına ev inşa edilmesi hususunda mütevelli vekili Mehmed Tahir Efendi ile anlaştıkları Ma‘rûz İstanbul’da Langa kurbünde Kâtib Kasım mahallesinde mütemekkin iken bundan akdem hâlik olan Ağya v. Toros nâm zimmînin sulb-ı sagîr oğlu İsayi ve sagîre kızı Maryem’in vasîleri Bedros v. Avanes nâm zimmî ile kebîr oğlu diğer Avanes nâm zimmî sâdır olan emr-i âlîlerine imtisâlen müfettiş-i sadr-ı a‘zâmî müderrisîn-i kirâmdan İbrahim Efendi ile bi’l-ma‘iyye dâ‘îhânede ma‘kûd meclis-i şer‘-i şerîf-i enverde hâlik-i mersûmun kebîre kızı şahsı mu‘arrefe Turfanda nâm Nasrâniye muvâcehesinde zikri âtî vakıfların mütevellîleri tarafından vekîli Mehmed Tahir Efendi hâzır olduğu hâlde hâlik-i mersûmun ile’l-vefât tasarrufunda olup ba‘de helâkihî evlâdları mersûmûna âdiyen ve seviyyen intikâl eden mahalle-i mezbûrede vâki‘ beyne’l-cîrân ma‘lûmü’l-hudûd nezâret-i sadr-ı a‘zamîde âsûde Siyavuş Paşa ve İstanbul kadısı nezâretinde Mihrimâh Hânım Vakıflarından icâre-i mü’eccele-i ma‘lûmeli ma‘lûmü’z-zirâ‘ mahlût ve muhterik menzil arsası üzre mersûme Turfanda binâ inşâ ve arsa-i mezkûreyi müstakille tasarruf etmekle biz dahî asâleten ve vesâyeten hisselerimize tasarruf murâd ederiz deyü da‘vâ ettiğimizde ol dahî cevâbında mersûm Bedros vesâyeten ve oğlu mesfûr asâleten menzil-i mezkûru binâ et her ne sarf eder isen veririz ve kıbel-i şer‘den binâya me’zûn olduk deyü bana emr etmeleriyle ben dahî binâ edip ve oğlu mersûm Avanes binâya sarf içün seksen guruş bana teslîm ben dahî kabz etmemle masrûfumdan hisselerini bana edâ etsinler deyip ol vecihle beynimizde ba‘de vukû‘i’l-münâza‘a bâ-vesâtat-ı muslıhîn arsa-i mezkûreden sagîrân-ı mezbûrânın hisselerini bedel-i misilleri olan yüz yirmişer guruşdan iki yüz kırk guruş bedel mukâbelesinde ve mersûm Avanes zimmînin medfû‘u olup kabzla mu‘terife olduğu seksen guruş ile urûsadan hissesi bedeli olan yüz yirmi guruş ki cem‘an iki yüz guruş mukâbelesinde kat‘an li’n-nizâ‘ ve nef‘an li’l-sıgâr bâ-re’y-i mütevellî mersûme Turfanda Nasrâniye’ye ferâğ ve tefvîze vesâyeten asâleten ta‘ahhüd eylediğimizde ol dahî râzı oldu deyü eylediği takrîrlerini mersûme Turfanda tasdîk eylediği huzûr-ı âlîlerine i‘lâm olundu. Fî 23 min Zilhicce sene 1202.