İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 233 Hüküm no: 255 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Muhyiddin Kocavî mahallesi İmâmı es-Seyyid Osman’ın, mahalle ahalisinin şikayetleri üzerine mahalleden çıkarılmasının talep edildiği Ma‘rûz İstanbul’da Cibâli Kapısı kurbünde Üskûbî mahallesi imâmı es-Seyyid Ahmed Efendi ve Müezzini Molla Hayrullah ve Kayyım Molla İbrahim ve âhâlî-i mahalleden el-Hâc Ahmed ve el-Hâc Mehmed Emin ve Hasırcı Hoca Şeyh Halil Efendi ve Yağcı Halil ve diğer el-Hâc Ahmed ve Sahhâf Molla Hasan ve Veliyyüddin ve Zaîm Mustafa ve Ömer Ağa ve Fazlı Beşe ve Kömürcü Ahmed ve Pirinçci Ali ve Basmacı Ali ve âhar Ahmed Ağa ve Çörekçi diğer Ahmed ve Basmacı Abdülkadir ve es-Seyyid Yusuf ve Molla Mehmed Emin ve es-Seyyid Ali ve Pirinçci Memiş ve âhar Ahmed Ağa ve Sahhâf Molla İsmail ve Kazgancı Molla İbrahim ve Kazgancı Mehmed ve Kalaycı Mustafa Mansurzâde Mustafa Efendi ve Çukadâr Hüseyin vesâ’irleri meclis-i şer‘-i münîrde Şeyh Muhyiddin Kocavî mahallesi İmâmı es-Seyyid Osman b. es-Seyyid Ahmed muvâcehesinde imâm-ı mezbûr es-Seyyid Osman mahallemiz sâkinlerinden olup lâkin kendi hâlinde ırzıyla mukayyed olmayıp mahalle-i mezbûre sûkunda dahî bir bâb berber dükkânını istîcâr ve kahvehâne edip dâ’imâ mechûlü’l-ahvâl kimesneler tecemmü‘ ve külli yevm mest ü müdâm ve civârında olan ahâlî-i mahalleye şetm ve ahâlî-i mahalle kendiden dil-gîr olduğumuzdan mâ‘adâ keyfiyet-i mezkûre nice nice fesâda sebeb olur hâlâtdan olmağla men‘ ve def‘ olunmak murâdımızdır deyü her biri bi’l-muvâcehe teşekkî eylediklerinde li-ecli’t-tefahhus cânib-i şer‘-i mutahhardan irsâl olunan İkinci Kâtib Merhabâzâde Mahmud Efendi sâlifü’z-zikr Şeyh Muhyiddin Kocavî Mescid-i Şerîfi’ne varıp huzûr-ı Müslimînde ba‘de akdi’l-meclis imâm-ı mezbûr es-Seyyid Osman’ın gıyâbında keyfiyet-i hâlini tefahhus ve suâl eyledikde evvelen mârrü’z-zikr Şeyh Muhyiddin Kocavî mahallesi ahâlîsinden es-Seyyid el-Hâc Hasan ve Musa Ağa ve el-Hâc Mehmed ve Tuzcu Süleyman ve Tuzcu Halil ve Kahveci Salih ve el-Hâc Süleyman ve el-Hâc Abdullah ve es-Seyyid el-Hâc Hüseyin ve el-Hâc Ahmed ve el-Hâc Halil ve âhar el-Hâc Abdullah ve âhar el-Hâc Berber Halil ve diğer el-Hâc Ahmed ve es-Seyyid eş-Şeyh İbrahim Efendi ve es-Seyyid Halil ve Tuzcu Mustafa ve Mehmed Emin ve Yemenici es-Seyyid Halil ve Tuzcu Ahmed ve Süleyman ve Miskci es-Seyyid Abdullah ve Süleyman ve Müezzin Hâfız Mehmed vesâ’irleri ile civârında Haraçcı Kara mahallesi imâmı vekîli İbrahim Efendi ve müezzin diğer İbrahim ve ahâlîsinden es-Seyyid Mehmed Emin ve Salih ve Kömürcü Mehmed ve Türbedâr Hâfız Mustafa ve Molla Ali ve Berber Ahmed vesâ’ir ve civârında Seferikoz mahallesi İmâmı es-Seyyid Mustafa Efendi ve Müezzini Molla Mehmed ve ahâlî-i mahalleden Süleyman Efendi ve Kutucu Ahmed Beşe ve Derviş Süleyman ve Molla Mehmed Emin ve el-Hâc Mehmed Ağa ve Ahmed ve civârında Salih Paşa mahallesi İmâmı Halil Efendi ve ahâlî-i mahalleden es-Seyyid Mehmed ve Müezzin es-Seyyid Mehmed Emin ve Tabancacı Ali ve Ömer Ağa ve Molla Hasan vesâ’irleri meclis-i ma‘kûd-ı mezkûrda imâm-ı mezbûr es-Seyyid Osman’ın hakkında olan teşekkî vâkı‘â mutâbık olup ve imâm-ı mezbûr es-Seyyid Osman cemî‘ menhiyâtı mürtekib ve ef‘âl-i gayr-ı meşrû‘aya mütecâsir olmağla ol vecihle imâm-ı mezbûr es-Seyyid Osman’dan bir dürlü emn ü râhatımız meslûb olmağın imâm-ı merkûm es-Seyyid Osman imâmet-i mezkûreye cümlemizin muhtârı bir kimesneyi vekîl ve sâlifü’z-zikr Üskûbî mahallesinden hurûcunu iltimâs eylediklerini kâtib-i merkûm mahallinde ketb ve tahrîr ve ma‘an mürsel ümenâ’-i şer‘le meclis-i şer‘a gelip alâ vukû‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 28 min Zilhicce sene 1202.