İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 246 Hüküm no: 269 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Diyarbekrî Mehmed Ağa ile ortağı Mehmed Ağa’nın, Hamal Kalos, Ahram ve Kabril hakkında hırsızlık töhmetiyle açtıkları davayı ispat edemedikleri Ma‘rûz Derûn-ı arzuhâlde mezkûrü’l-ism Diyarbekrî Mehmed Ağa b. Yasin ve şerîki diğer Mehmed Ağa b. Osman nâm kimesneler meclis-i şer‘-i şerîf-i enverde âhar arzuhâl ile sâdır olan emr-i âlîye imtisâlen asesbaşı ve subaşı ma‘rifetleriyle li-ecli’t-tefahhus mahbûs Vâlide Hânı hamallarından Kalos ve Ahram ve Kabril nâm zimmîlerden mersûm Kabril v. Kirkor ile terâfu‘larında Vâlide Hânı’nda müşâhereten müste’ciri olduğumuz beyne’l-cîrân ma‘lûm odamızda mahfûz malımızdan târîh-i i‘lâmdan on bir gün mukaddem gece ile oda-i mezbûrenin bâbı mesdûd ve mukaffel olduğu hâlde bir bohça derûnunda bin dokuz yüz guruş kıymetli yirmi sekiz aded donluk ve bir aded ketfî şalımız sirka olunmağla zikr olunan şalları hamâl-ı mersûm Kabril zimmî ahz eyledi deyü da‘vâ ve ityân-ı beyyineden âciz olmalarıyla muvâcehelerinde vech-i şer‘î üzre tahlîf olunup mûcebince müdde‘iyyân-ı merkûmân Kabril zimmîye da‘vâ-yı mezkûresiyle bî-vech-i şer‘î mu‘ârazadan ba‘de’l-men‘ hân-ı mezkûr sükkânından Hüseyin Ağa ve Abdullah Ağa ve Halebî el-Hâc Ebubekir Ağa ve Şâmî el-Hâc Mehmed Ağa ve Seyyâfzâde es-Seyyid Mustafa Ağa ve eş-Şeyh Ahmed Efendi ve Cafer Efendi ve Hâncızâde İbrahim Ağa ve el-Hâc Süleyman Ağa ve Mehmed Çelebi ve es-Seyyid Ahmed Ağa nâm kimesneler dahî hamâl-ı mersûm Kabril ve refîkleri Kalos ve Ahram zimmîlerden her biri müstakîmü’l-etvâr olduğunu ihbâr ile tekeffül eyledikleri İstanbul Mahkemesi’nden huzûr-ı âlîlerine i‘lâm olundu. Fî 18 min Muharrem sene 1203.