İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 246 Hüküm no: 270 Orijinal metin no: [74a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Reis’in buğday bahasından es-Seyyid Nuh’dan alacaklı olduğu Ma‘rûz Arzuhâl eden Mustafa Re’is b. Hüseyin meclis-i şer‘de derûn-ı arzuhâlde ismi mezkûr es-Seyyid Nuh b. es-Seyyid Mustafa muvâcehesinde mezbûr es-Seyyid Nuh bundan akdem yedimden iştirâ ve kabz eylediği keyl ve fiy’âtı beynimizde ma‘lûm buğday semeninden bâkî iki yüz guruş ile beher keyl altmış beşer pâreye olmak üzere sefînemden gasben ahz eylediği dört yüz yetmiş keyl buğday semeni olan cem‘an yedi yüz altmış [74b] üç guruş otuz pâre ki cem‘an dokuz yüz altmış üç guruş otuz pâreyi bundan akdem taleb ve da‘vâ eylediğimde ol dahî inkâr edip beynimizde ba‘de vukû‘i’l-münâza‘a bâ-vesâtat-ı muslıhîn da‘vâ-yı mezkûremden merkûm es-Seyyid Nuh ile an inkâr yirmi guruş üzerine ba‘de akdi’l-musâlahati ve’l-kabûl bedel-i sulh-ı meblağ-ı mezbûr yirmi guruşdan mâ‘adâ bi’l-cümle husûs-ı mezkûra ve işbu târîh-i i‘lâma gelince hukûk-ı sâ’ireye müte‘allika âmme-i da‘vâdan merkûm es-Seyyid Nuh’un zimmetini ibrâ’-i âmm-ı sahîh-i şer‘î ile ibrâ’ ve iskāt eyledim dedikde ol dahî ba‘de’t-tasdîk ve’l-kabûl ibrâdan istisnâ olunan bedel-i sulh olan meblağ-ı merkûm yirmi guruşu bi’t-taleb müdde‘î-i merkûm Mustafa Re’is’e edâ ve teslîm merkûm es-Seyyid Nuh’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 18 min M. sene 1203.