İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 247 Hüküm no: 271 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’ya ait ekmek fırını gedik kaydının Ali Beşe’den düşürülüp dükkanın Nezir ve Osman Beşe’ye kiraya verilmesi Ma‘rûz Arzuhâl eden Mustafa Ağa b. Ahmed kendi nefsinden asâleten ve vâlidesi Fatma bt. Abdullah tarafından vekîli olmağla vekâleten meclis-i şer‘-i şerîf-i enverde Habbâzân Kethüdâsı İsmail ve nizâm ustaları Kurd Ağa, Abdullah Beşe, Ali Beşe, Ebubekir Beşe, Usta Aleksan, Tokel Usta, Kirkor vesâ’ir mazbûtü’l-esâmî ustalar hâzırlar oldukları hâlde habbâzân tâ’ifesinden Nezir Beşe b. Ahmed ve Osman Beşe b. Abdullah mahzarlarında takrîr-i kelâm edip vâlidem mezbûre bi’l-iştirâk mutasarrıf olduğumuz İstanbul’da Tavukpazarı’nda vâki‘ Yüzcü? el-Hâc Hüseyin Fırını dimekle ma‘rûf bir bâb habbâz fırınında beher şehr on beşer guruş kirâ ile merkûmân Nezir Beşe ve Osman Beşe müşâhereten müste’cirlerimiz olup lâkin sene-i mâziye Receb-i Şerîfi’nden beru merkûmân fırın-ı mezkûru ta‘tîl ve sed etmeleriyle kemâ fi’l-evvel küşâd ve zimmetlerinde müctemi‘a altı aylık doksan guruş kirâyı asâleten ve vekâleten taleb eylediğimde anlar dahî cevâblarında yedimizde olan sûret mûcibince fırın-ı mezkûr derûnunda mevcûde âlât-ı lâzıme başmuhâsebede Ali Beşe nâm kimesne üzerinde mukayyed ve mezbûr Ali Beşe’nin dahî cânib-i mîrîye deyni olup edâya adem-i kudreti olmağla bin iki yüz senesi Ramazân’ı evâhirinde deyn-i mîrîyi mukassatan edâ etmek üzre âlât-ı mezkûreyi mezbûr Ali Beşe bâ-i‘lâm bize tefvîz edip lâkin fırın-ı mezkûrun değirmeni muhterik olmağın dakîk tedâriki i‘mâl olundukda hâsılı harcına vefâ etmeyip edâ-yı deyn-i mîrî müte‘assir olmağla fırın-ı mezkûrdan âlât-ı merkûmeyi hâlâ müste’ciri olduğumuz Dikilitaş’da vâki‘ âhar bir bâb habbâz fırınına nakl ettik deyü bizim fırınımızı tahliye ve bize teslîm biz dahî ba‘de’l-yevm habbâz fırını olmamak üzre akâr-ı âhara tebdîle ta‘ahhüd ve zikr olunan doksan guruş kirâ mutâlebesinden zimmetlerini ibrâ eyledik deyü eylediği bi’l-cümle takrîrini mezbûrân ve hâzırûn-ı merkûmûn tasdîk edip âlât-ı mezkûrenin Tavukpazarı’nda Ali Beşe üzerine olan kaydı terkîn hâlâ Dikilitaş’da Nezir Beşe ve Osman Beşe üzerlerine kayd ve yedlerine sûret verilmek ricâsında oldukları huzûr-ı âlîlerine i‘lâm olundu. Fî 20 min Muharrem sene 1203.