İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 248 Hüküm no: 272 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ahmed’in mutasarrıf olduğu beş adet kasap dükkanı gedik hisse ve aletlerini el-Hâc Osman Ağa’ya sattığı Ma‘rûz Evkâf-ı hümâyûn-ı hazret-i şehriyârîden Dokuzuncu Selhhâne’ye merbût olup İstanbul’da Tavukpazarı’nda köşebaşında [75a] Bakar-ı kazânî’de(?) muttasıl bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzımenin sülüs hissesine kezâlik selhhâne-i mezkûre merbût Tavukpazarı’nda köşebaşında çilingir karşısında vâki‘ bir bâb dükkân derûnunda mevcûde âlât-ı lâzımenin dahî rub‘ hissesine kezâlik selhhâne-i mezkûre merbût Kumkapı dâhilinde İncirdibi nâm mahalde vâki‘ bir bâb dükkân derûnunda mevcûde âlât-ı lâzımenin nısf hissesine kezâlik Beşinci Selhhâne’ye merbût Nûr-ı Osmânî kurbünde köşe başında vâki‘ bir bâb dükkân derûnunda mevcûd âlât-ı lâzımenin sülüs hissesine kezâlik Yedinci Selhhâne’ye merbût Aksaray’da Acıçeşme kurbünde bir bâb dükkân derûnunda mevcûde âlât-ı lâzımenin hissesine beş kıt‘a mütevellî-i vakf temessüküyle mutasarrıf el-Hâc Ahmed b. Ebubekir tarafından vekîl-i sâbitü’l-vekâlesi Abdülgafûr b. Mustafa meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından mazbûtü’l-esâmî kimesne hâzır olduğu hâlde el-Hâc Osman Ağa b. el-Hâc Ali mahzarında bi’l-vekâle ikrâr ve takrîr-i kelâm edip müvekkilim mezbûr el-Hâc Ahmed zikr olunduğu vech üzere beş bâb dükkânda mevcûde âlât-ı lâzımelerden mutasarrıf olduğu hisse-i mezkûreleri hüsn-ı rızâ ve tayyib-i ihtiyâriyle bedel-i ma‘lûm ve makbûz mukâbelesinde mezbûr el-Hâc Osman Ağa’ya ferâğ ve tefvîz ol dahî tefevvüz ve kabûl etmeğin ba‘de’l-yevm zikr olunan hisselerde müvekkilim merkûmun kat‘an alâkası kalmayıp cümlesi mezbûr el-Hâc Osman’ın hakk-ı mufavvazı olmuşdur dedikde gıbbe’t-tasdîk mezbûr el-Hâc Osman hisse-i mezkûrelerin kaydları defter-i vakfdan terkîn olunup kendi üzerine kayd birle yedine bir kıt‘a müceddeden temessük i‘tâ olunmak ricâsında olunduğu İstanbul Mahkemesi’nden huzûr-ı âlîlerine i‘lâm olundu. Fî 20 min Muharrem sene 1203.