İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 249 Hüküm no: 274 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazzâz ve çehre bürüncek bükücü esnafının hilâf-ı kânûn birbirlerinin işlerine karışmamaları Ma‘rûz Âsitâne-i aliyye’de vâki‘ çehre bürüncek bükücü esnâfının kethüdâsı el-Hâc Ahmed Ağa ve Yiğitbaşı Hüseyin ve Ömer Usta ve el-Hâc İbrahim Usta ve Molla Mehmed Usta ve Mustafa Usta ve Halil Usta ve Usta Andriyas ve Usta Kirkor ve Usta Karabet ve diğer Usta Kirkor ve Serope ve Asvadar nâm kimesneler meclis-i şer‘-i şerîf-i enverde kezâlik Âsitâne-i aliyye’de vâki‘ kazzâz esnâfının kethüdâsı Ömer Ağa [75b] ve Yiğitbaşı Mehmed Odabaşı ve Usta Mığırdıç ve Usta İstefan ve Usta Evadik ve Usta Artin ve Usta Hacador ve Usta Karabet ve diğer Usta İstefan ve Atamoğlu Usta Artin ve Usta Kirkor ve Usta Paskal ve Usta Angeli ve Usta Ohannes ve Usta Partemyoz ve Usta Aknados ve Usta Mankasar ve Usta Serope ve Usta Malkon ve Bahçıvânoğlu Serope ve Usta Arslan ve Usta Mosi ve Usta Menahim ve Usta İsak ve Usta Yako nâm kimesneler muvâcehelerinde takrîr-i kelâm edip elvân pesend harîri ve kirli tebre ve nakış tebresi ve beyaz dikiş harîri ve yün harîri ve elvân-ı Sandalcı harîri ve çilelik harîr ve elvân-ı ibrişim ve Sakız kârı ve evlân-ı gaytân ve elvân-ı şerît ve düğme ve sünbüle ve öksüzce ve parmak şerîdi ve harîk bükme ve ibrişim kırma ve frenk penbesi ve kırma yün harîri ve elvân-ı Trabzon ipliği ve kadife frenk şerîdi ve alaca frenk şerîdi ve kılâbdancı pûşîsi ve taşradan tevârüd eden bükülmüş ibrişim ve harîr bey‘ ve şirâsı kazzâz esnâfına mahsûs olup kenarlık harîr ve kenarlık tebre ve Sakız penbe ipliği ve kezâlik Tekfûrdağı penbe ipliği bey‘ ve şirâ‘sı bükücü esnâfı ile kazzâz esnâfı beyinlerinde müşterek olup taşradan tevârüd eden harîrin dahî incesin bürüncek bükücü esnâfı olup kazzâz esnâfı dahi kendilere lâzım olan nev‘den kadar-ı kifâye vakt-i hâle göre değer bahâsıyla tüccârdan iştirâ edip lâkin bürüncek çehre etmek ancak bükücü esnâfına mahsûs olup kazzâz esnâfı tarafından ve taraf-ı âhardan bükücü esnâfına harîr verip ücret ile çehre bükdürmek bâ-emr-i âlî memnû‘ iken bundan akdemce hilâf-ı emr-i âlî kazzâz esnâfı bükücü esnâfına hufyeten harîr verip ücret ile çehre bükdürmeleriyle beynimizde ba‘de vukû‘i’l-münâza‘a bâ-vesâtat-ı muslıhîn kazzâz esnâfı ber-mûceb-i emr-i âlî min ba‘d hufyeten harîr verip çehre bükdürmemeğe ta‘ahhüd eylediklerinden sonra kendi nizâmlarına dâ’ir yedlerinde olan bir kıt‘a emr-i âlîde çehre bey‘ edeler deyü muharrer olup bir nesneyi bey‘ mebî‘in âhardan şirâsını mûcib ve müstelzim olmağın eğerçi bükücü esnâfına ücretle çehre bükdürmekden memnû‘larız lâkin çehre bey‘ine me’zûn olmamız ile bükücü esnâfından çehre iştirâ edip dükkânlarımızda Suriçi üzre ibâdullâha bey‘ edelim deyü ancak çehre mübâya‘asına tâlib ve râgıb olmalarıyla biz dahî râzılar olup ba‘de’l-yevm kazzâz esnâfına iktizâ eden çehreyi Vâlide Hânı’nda vâki‘ lonca odamızdan almak üzre tâmmü’l-vezn olup ve kalb ve reddî olmadığı hâlde çehre bey‘ine ta‘ahhüd edip ve işbu nizâm beynimizde müstakar olmak içün hâlâ oda-i mezkûrede mevcûd çehrelerimizden ma‘lûmü’l-aded çehreyi beynimizde ma‘lûm semen mukâbelesinde merkûmlara bey‘ ve temlîk ve teslîm anlar dahî iştirâ ve temellük ve tesellüm ve kabûl eylediler deyü eyledikleri bi’l-cümle takrîrlerini kazzâz esnâfı bi-ecma‘ihim tasdîk edip işbu şürût-ı nizâm düstûrü’l-amel tutulmak içün başmuhâsebeye kayd ve yedlerine bir kıt‘a tuğrâlı emr-i âlî inâyet ve ihsân buyurulmak ricâsında oldukları [76a] huzûr-ı âlîlerine i‘lâm olundu. Fî 27 min Muharrem sene 1203.