İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 250 Hüküm no: 275 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkâş Hasan’ın, Ahmed Bey’in Kumkapı’daki menzilinin selamlık kısmının yıkılıp yeniden inşasına dair işçilik parası hususunda sulh yoluyla anlaştıkları Ma‘rûz Arzuhâl eden Nakkâş Hasan b. Ahmed meclis-i şer‘-i şerîf-i enverde silahşor-ı hazret-i şehriyârî Ahmed Bey b. el-merhûm Lala Mustafa Ağa tarafından husûs-ı âtîde vekil olduğu Ebubekir b. Mustafa ve Osman b. Hasan şehâdetleriyle sâbit olan es-Seyyid İbrahim Ağa b. Hasan mahzarında dülger kalfalarından Anastaş nâm zimmî hâzır olduğu hâlde müvekkil-i mûmâileyh Ahmed Bey’in Kumkapı’da vâki‘ hâlâ sâkin olduğu menzilin selâmlık cânibini mersûm Anastaş zimmî hedm ve müceddeden binâ edip ben dahî mersûm Anastaş zimmînin vesâtatıyla zikr olunan selâmlık cânibini ve haremde dahî bir bâb oda ve üç aded sokak kapısını boyayıp müvekkil-i mûmâileyhin emriyle zikr olunan vech üzere benim ve istîcâr eylediğim kalfaların cem‘an beş yüz yirmi dört gündelik içün matlûbum olan altı yüz altmış beş buçuk guruşdan üç yüz seksen dokuz guruşunu kabz mâ‘adâ iki yüz yetmiş altı buçuk guruşunu edâ etmeğin müvekkil-i mûmâileyhden taleb ve da‘vâ eylediğimde ol dahî edâ ettim deyip beynimizde ba‘de vukû‘i’l-münâza‘a bâ-vesâtat-ı muslıhîn da‘vâ-yı mezkûremden müvekkil-i mûmâileyhe kırk beş guruş üzerine sulh olup her birimiz sulh-ı mezkûru kabûl ve bedel-i sulh-ı mezkûr kırk beş guruşu vekîl-i mezbûr yedinden tamâmen ahz u kabz edip mâ‘adâya ve târîh-i i‘lâma gelince cemî‘ hukûk-ı şer‘iyyeye müte‘allika da‘vâdan müvekkil-i mûmâileyhin ve mersûm Anastaş zimmînin zimmetlerini ibrâ’-i âm ile ibrâ ve iskāt eylediğimde anlar dahî kabûl eylediler deyü eylediği takrîr-i meşrûhunu vekîl-i mezkûr tasdîk ve bu vecihle kat‘-ı nizâ‘ eyledikleri huzûr-ı âlîlerine i‘lâm olundu. Fî 11 min Muharrem sene 1203.