İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 251 Hüküm no: 276 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Culah esnafının işlerine karışan ve gizlice bez işleyen kazzâz esnafından Kabril ve kayınatası Atamoğlu Artin’in tekrar culah esnafının işlerine karışılması durumunda meslekten çıkarılmalarının istendiği Ma‘rûz Âsitâne-i aliyye’de vâki‘ culah esnâfının kethüdâsı el-Hâc Ahmed ve Yiğitbaşı İbrahim ve ustalardan el-Hâc Süleyman ve Halil Odabaşı ve el-Hâc Veliyyüddin ve el-Hâc Mehmed ve el-Hâc Mustafa ve Ali ve Hüseyin ve Mustafa ve İbrahim ve es-Seyyid Mustafa ve Ali ve el-Hâc Ali ve Mehmed ve Süleyman ve diğer Ali ve Ömer ve Ebubekir ve diğer Mustafa ve Mehmed ve Emirali nâm kimesneler meclis-i şer‘-i şerîf-i enverde kazzâz esnâfından Kabril v. Maldon nâm zimmînin kayın atası Atamoğlu Artin nâm zimmî muvâcehesinde Kazzâz Kethüdâsı Ömer Ağa ve Yiğitbaşı Mehmed Odabaşı hâzır oldukları hâlde her biri takrîr-i kelâm edip işbu yedimizde olan hüccet-i şer‘iyye ve evâmir-i aliyye müte‘addiler nâtık olduğu vech üzere san‘atımız nisvâna müte‘allik olmağla erbâbı ve destgâh ashâbı olan usta ma‘lûm ve mahfûz ve emin ve mu‘temed ve mültehî olup ve cümlemiz birbirine kefîl ve hâricden san‘atımıza kimesne karışmayıp ve cümlemiz doksan bir nefer usta ve her bir ustaya iki destgâh ta‘yîn ve tahsîs olmağla zikr olunan cem‘an yüz seksen iki aded destgâhda ibâdullâhın nesc içün verdikleri mallarını zâyi‘ ve telef etmeyip vech-i lâyık üzre hizmetlerin edâ ettiğimizden mâ‘adâ kendi mâlımız ile nesc eylediğimiz bezlerimizi dahî memleket-i Hicaz ve memâlik-i sâ’ireden gelen tüccâr iştirâ ve her biri kendi diyârlarına tesyîr ile cümlemiz mestûrü’l-hâl ve âmme-i ibâdullâha müntefi‘ olurlar iken işbu Atamoğlu Artin zimmînin dâmâdı mersûm Kabril zimmî üç seneden beru san‘atımıza müdâhale ve tüccârı bizden tenfîr ve ustalarımızdan ba‘zılarını iğfâl ve hufyeten bez nesc etdirip tüccâra bey‘ ile kesbimize mâni‘ ve cümlemizin fakr-ı hâline bâ‘is olduğuna binâ’en mersûm Kabril zimmî ile muhâsama murâd eylediğimizde kayınatası mersûm Artin ba‘de’l-yevm dâmâd-ı mesfûr Kabril umûrumuza müdâhale etmeyip ve ustalarımıza hufyeten bez nesc ettirmemeğe ta‘ahhüd ve tekeffül ve mersûm Artin zimmîye dahî kethüdâları mezbûr ve yiğitbaşı merkûm tekeffül edip ba‘de’l-yevm ustalarımızdan her kim mersûm Kabril zimmîye hufyeten bez nesc eder ise san‘atından ihrâc olunmak üzre mu‘âhede eyledik deyü eyledikleri bi’l-cümle takrîrlerini mersûm Artin ve kethüdâ ve yiğitbaşı merkûmân gıbbe’t-tasdîk culah esnâfı yedlerinde olan işbu i‘lâm düstûrü’l-amel tutulmak içün başmuhâsebeye kayd ve yedlerine bir kıt‘a tuğrâlı emr-i âlî inâyet ve ihsân buyurulmak ricâsında oldukları İstanbul Mahkemesi’nden huzûr-ı âlîlerine i‘lâm olundu el-emrü li-veliyyi’l-emr. Fî Gurre-i Safer sene 1203.